Уганданың батысындағы Торо корольдігінде 34 жастағы король Ойо Ньимба Кабамба Игуру Рукиди IV қайтыс болды. Ол небәрі үш жасында таққа отырып, әлемдегі ең жас билік еткен монарх ретінде Гиннестің рекордтар кітабына енген.
Корольдің нақты неден қайтыс болғаны әзірге ресми түрде айтылған жоқ. Хабарламада оның ұзақ уақыт ауырғаны, болжам бойынша қатерлі ісікпен күрескені көрсетілген.
Ойо 1995 жылы әкесі, король Кабойодан кейін таққа отырған. Оның таққа отыру рәсімі дәстүрлі салттармен өткен. Үш жастағы бала сарай қақпасындағы символдық шайқастан өтіп, ата-бабаларының қасиетті барабанын соққаннан кейін король ретінде жарияланған.
Ол балалық шағында қатарластарымен бірге өсіп, мектепте білім алған. Кейін Англиядағы Винчестер университетінде экономика мамандығын оқыған. Кәмелет жасына толғанға дейін корольдіктің мемлекеттік істерін анасы басқарған.
Торо корольдігінде екі миллионнан астам адам тұрады. Угандада бірнеше дәстүрлі монархия сақталған. Олар елдің саяси өмірінде шешуші рөл атқармағанымен, мәдени және тарихи тұрғыдан маңызды саналады.
Ойо үйленбеген. Алайда оның премьер-министрінің айтуынша, король артында мұрагер қалдырған. Мұрагердің кім екені Торо корольдігінің дәстүрлі рәсімдеріне сәйкес кейінірек жарияланбақ.
Жас монарх жергілікті халық арасында беделді болған. Ол жастарды қолдау, ауыл шаруашылығын дамыту және АИТВ-мен күрес мәселелеріне ерекше көңіл бөлген.
Пікірлер жоқ. Бірінші болыңыз!