Бәрі бақытты болғысы келеді. Сол анық. Біз де бақытты болғымыз келеді. Ертең емес, арғы күні емес, бүгін. Ал, Қазақстан халқы бақытты ма? Біздің бір бақытымыз – бейбіт өмірде, соғыссыз, мамыражай күй кешіп жатқанымыз. Бірақ, несие деген қамытқа басын кигізген, көбінің жалақысы мардымсыз, зейнет жасы ұзарған, жұмыс таппай сенделген, баспанаға қолы жете алмай, пәтер жағалап жүрген, өмірден баз кешкен, жемқорлық жайлаған, тілі әлі төрге шыға алмай тұрған, сөз бостандығы шектелген, демографиясы дағдарған… бұқараны бақытты дей аламыз ба?
Ал, кеше ғана Gallup International тәуелсіз зерттеу агенттіктері халықаралық қауымдастығы жүргізген жаһандық сауалнаманың нәтижесі шықты. Қызығы сол, онда Қазақстан 2021 жылы халықтың бақыт индексі ең жоғары әлемдегі бес елдің қатарына еніпті. Бақыт индексі – бұл бақытты және бақытсыз адамдар арасындағы айырмашылық. Gallup International зерттеуі әлемнің 44 елінде жүргізіліпті. Оған 42 мыңға жуық адам қатысқан.
Зерттеу нәтижесіне сүйенсек, бақыт индексінің ең жоғарғы көрсеткіші Колумбияда (+79), Қазақстанда (+76), Албанияда (+74), Малайзияда (+73) және Әзербайжанда (+70) тіркелген. Ал бақыт индексінің ең төменгі көрсеткіші Ганада (+2), Ауғанстанда (+9), Гонконгта (+11), Иракта (+17) және Ресейде (+18) тіркелген. Сонымен бірге, АҚШ, Ұлыбритания және Германия орташа әлемдік деңгейден сәл төмен, бірақ Ресейдегіден екі есе дерлік жоғары нәтижелер көрсеткен. «Бақыт деңгейі табыс деңгейімен тікелей байланысты емес», – дейді Gallup International вице-президенті Андрей Милехин.
Ал, халық бақытты болуы үшін жоғарыда айтылған мәселелердің бәрі шешілген, болашаққа деген сенімі нық болуы керек ғой. Әлгі зерттеу ұйымының өкілдері біздің елде кімге жолығып, кіммен сөйлескенін қайдам, әйтеуір, біз бақытты екенбіз. Расы сол, бізде ертең емес, арғы күні емес, дәл бүгін бақытты болғысы келіп жүрген қазақ көп емес пе? Сіз қалай ойлайсыз?
Н.АҚПАН
Пікірлер жоқ. Бірінші болыңыз!