Арал ауданындағы №71 орта мектебінің көркем еңбек пәнінің мұғалімі Нұржан Балов «мерекеде әріптес қыз-келіншектерге жасаған сыйлығымыздың шынайы болғанын қаладым» дейді. 70 әшекей бұйымды жасауға мектептің ер мұғалімдері 4 күн уақыт жұмсапты.
– 8 наурыз – Халықаралық әйелдер күні мерекесі қарсаңында әріптестерге қол еңбегінен туындылар жасау туралы идея тастаған болатынмын. Олар қолдау білдірді. Керекті қаражатты, заттарды бірге жинадық. Әшекейлерді жасауға 4 күн уақытымыз кетті. Әріптестерміз де көмектесті. Бұл – шыдамдылықты, асқан ұқыптылықты қажет ететін жұмыс. Сондықтан, оңай болды деп айта алмаймын. Абырой болғанда жоспарлаған уақытымызда аяқтап, мектебіміздегі 70-тен аса қыз-келіншекке ою-өрнек бедерленген зергерлік бұйымдарды табыстадық. Ең бастысы – шынайы сыйлық, қол еңбегіміз, – деді ол.
Нұржан Ертөреұлының жаңашылдыққа жаны құмар жан екенін әріптестері жақсы біледі. Ерекше тартуға ұжымдағы апайлар қауымы таң-тамаша болып, алғаусыз алғысын айтқан. Әрі Ақтау қаласынан тұмар жасауға тапсырыстар түсіп жатқанын да жеткізді.
– Негізі атам шебер адам болған. Бұл – маған аталарымнан дарыған өнер. Ұстаз болғандықтан, сабақ барысында оқушыларға қолжетімді материал деп энергетикалық сусындардың қалбырынан түрлі зергерлік бұйым жасайтынмын. Сол арқылы оқушылардың қызығушылығын арттыруға тырысамын. Алғашқыда жеңіл-желпі бедерлеу әдісімен жан-жануарлардың формаларын келтіріп көрдім. Одан соң тұмар, шашбау, белдемше мен білезік жасадым. Осы арқылы аяулы аруларымыздың, аялы алақан иелерінің мерекесінде сыйлық жасауға болады деген ойға келдім және жүзеге асырдым, – деп сөзін жалғастырды зергер.
Арал аудандық білім бөлімінің басшысы Санира Жанназарова мерекелік кеште ұжымға ерекше тарту жасаған ер-азаматтардың ұйымшылдығына сүйсінгенін айтады.
– Қыз-келіншектердің мерекесінде білім беру ұйымдарының ер мұғалімдері концерттік бағдарлама ұйымдастырып, құрмет көрсетіп жатады. Шыны керек, бағдарламаның көпшілігі бір-біріне ұқсап кетеді. Ал, аудандағы №71 орта мектептің ер педагогтерінің сыйлығы маған қатты ұнады. Қолөнерді, зергерлік өнерді сәтті пайдаланып, тамаша тарту жасапты. Әр педагог өз шығармашылығын осылай дамытса, ерекше идеялар туындайтынына сенімдімін, – дейді ол.
Әлеуметтік желіде кеңінен тараған видеоға елімізге белгілі жазушылар, журналистер жарыса пікір жазып жатыр. Өз саласының хас шебері атанған Нұржан Ертөреұлын әріптестері де ерекше үлгі тұтады.
Ырыскелді ТӘЖІ
Ораза қабыл болсын!Керемет ісіңіздің берекесін берсін.Өзім тақпасам да әріптестердің мойындарынан,қолдарынан көріп өзім тақпасам да таққандай қызығып отырмын.Қолдан келсе қалай жасамасқа.Тек табыс тілеймін Өнеріңіз өрге жүзсін
Жарайсың Нұржан!Керемет жұмыс.
Өте керемет әшекейлер. Қазақтың салт -дәстүрі жалғасын таба берсін
Өте керемет әшекейлер. Қазақтың салт -дәстүрі жалғасын таба берсін!
Керемет
Керемет, таптырмас сыйлык! Ағайдың қолынан келмейтін ісі жоқ, Алла қолыңызға дерт бермесін!
Керемет,таптырмас сыйлык! Ағайдың қолынан келмейтін ісі жоқ, Алла қолыңызға дерт бермесін!