Ұстаз – ұлағатты есім. Ес білген шағыңнан бастап-ақ, балабақшада, мектепте, тіпті жоғарғы оқу орындарында да сен үнемі көмегі мен қолдауына зәру болатын жан – ұстаз. Сенің өмірге нық қадам басқанға дейінгі жолсерігің, дұрыс-бұрыс бағытыңды нұсқаушы – бағдаршамың. Өміріңнің алғашқы кірпіші боп қаланып, бақытың үшін бар жауапкершілігіне алып, білгенін аямайтын бірден-бір орны ерек тұлға. Ол туралы әлемнің екінші ұстазы әл-Фараби: «Ұстаз… жаратылысынан өзіне айтылғанның бәрін жете түсінген, көрген, естіген және аңғарған нәрселердің бәрін жадында жақсы сақтайтын, ешнәрсені ұмытпайтын алғыр да аңғарымпаз ақыл иесі, мейлінше шешен, өнер-білімге құштар, аса қанағатшыл жаны асқақ және ар-намысын ардақтайтын, жақындарына да, жат адамдарына да әділ, жұрттың бәріне жақсылық пен ізгілік көрсетіп қорқыныш пен жасқану дегенді білмейтін ержүрек» деп баға берген.
Десек те, бүгінгі күннің ұстазына бір назар бұрайықшы…
Қазақ қашанда ұстазды құрметтеген емес пе еді!? Айта кеткеніміздей, өміріміздегі орны ерекше жанды соңғы уақытта бұрынғысынан да ерекше бағалап, қадіріне жеткенімізден бе, қазірде екінің бірі ұстаз атын арқалауға тырысатындай. Салмағын жан сезбегенімен, жауапкершілік жүгін жанымен қабылдап, жүрекпен түсініп жатқаны шамалы. Сәйкесінше, «Еті саған болсын, сүйегі маған» деп сеніммен шәкірт етіп тапсыратын ата-ананың азайғанын да байқаймыз. Ұстаздың ұлы қызметін атқарғысы келетіндер расымен көбейіп қуантуда деп ойлайсыз ба? Бұл сұраққа бірқатар ұстаздың пікірімен жауап беруге тырысайық.
Қазіргі таңда ағылшын және қытай тілі мамандығының магистранты, «Достық» білім беру орталығының оқытушысы Гүлзия Жүгініс: «Расымен де қазіргі таңда ұстаздың құрметі артқан. Еңбегі еленіп, нәтижелі жұмысына сай көңіл толымды еңбек демалысын да алатын бірден-бір мамандық. Жауапкершілікке үйрете жүріп, өзіңді де тәрбиелейтін қызығы мен қиындығы қатар жүретін ерекше орта – мектеп. Құрметімен қоса жалақысы да артқаны көңіл қуантады, дегенмен, жаның сүйген іспен айналысып жемісін жеудің берекеті тіпті бөлек», – дейді.
Ұстаз дегенде білгенін бөлісуге асығатын жан ойға оралады. Олардың бүгінгі ахуалы қалай? Естен шығармайтын бір жайт бар, ол ұстаз – қай ортада да ұстаз. Соңғы уақытта мемлекет тарапынан мектеп мұғалімдеріне көрсетіліп жүрген қолдаулар мамандық майталманы болам деушілердің қатарын көбейтуде екенін айта кеттік. Бірақ ЖОО оқытушылары мен мектеп мұғалімдерінің еткен еңбектерінің терезесі теңескенімен, жалақы мөлшері мүлде бөлек. Осы турасында аздап тоқтала кетсек. Салыстырмалы түрде ЖОО-да 20 жылдан астам еңбек тәжірибесі бар тұлғаның айлық жалақысы мектепке қазір қабылданған жас маманның айлық табысынан аз мөлшерде. Қазіргі көрсетілім бойынша мектепке жаңа қабылданғандардың ең төменгі айлық мөлшері 230 000 теңгені құраса, ЖОО оқытушыларында 205 000 теңгеден аспайды.
– Дәл қазіргі уақытта мұғалімдік қызметке сұраныс көбеюіне жалақының жоғарылауы – негізгі мұрындық. Шындап келгенде ұстаздық ғылымға ғашық, жасөспірімдермен жұмыс істегенді жаны сүйетін, шын көңілімен қалаған жан келсе ғана жұмыс нәтиже бермек. Сонда ғана топ жарар тарлан шығары анық, – дейді Қорқыт ата атындағы ҚУ-дың аға оқытушысы Аякөз Әбдіразақова.
Жәмила ЕРМАХАН,
студент
Пікірлер жоқ. Бірінші болыңыз!