Мемлекет басшысы Қасым-Жомарт Тоқаев Қаржылық мониторинг агенттігінде жиын өткізіп, бұл құрылымның ел тарихындағы орнына өзгеше қырынан баға берді. Президенттің айтуынша, Агенттік Қазақстанда түбегейлі реформалар жүріп жатқан күрделі кезеңде құрылған және сол уақыттан бері өзіне жүктелген жауапкершілікті абыроймен атқарып келеді.
Бес жыл. Мемлекеттік жүйе үшін көп уақыт емес. Бірақ осы қысқа мерзімнің өзінде Қаржылық мониторинг агенттігі тәжірибе жинап қана қойған жоқ, экономикалық және ұлттық қауіпсіздіктің ажырамас тетігіне айналды. Мемлекет басшысы мұны кездейсоқ жетістік емес, табанды еңбек пен адал қызметтің нәтижесі деп атады. Президент сала мамандарын кәсіби мерекесімен құттықтап, атқарылған жұмысқа ризашылығын білдірді. Алайда бұл ризашылық босаңсуға себеп болмауы тиіс екенін де ашық айтты. Себебі ендігі сын – мүлде басқа деңгейде.
– Алдымызда биік мақсаттар мен ауқымды жұмыс бар. Әсіресе, цифрлық технология мен жасанды интеллект қарқынды дамып жатқан қазіргі кезеңде жұмысқа түбегейлі жаңа көзқараспен қарау міндеті тұр, – деді Қасым-Жомарт Тоқаев.
Бұл – ескерту емес, мемлекеттік бақылау жүйесінің жаңа дәуірге аяқ басқанының белгісі. Бұрын есеп пен тексеруге сүйенген модель енді дерек, талдау және технология арқылы жұмыс істеуі тиіс. Президент бұл туралы бұған дейін «Turkistan» газетіне берген сұхбатында да, Ұлттық құрылтай отырысында да нақты айтқанын еске салды.
Қаржылық мониторинг агенттігі бүгінде көлеңкелі экономиканы шектеу, заңсыз капитал ағынын тоқтату, қаржы пирамидалары мен трансұлттық қылмыстарға тосқауыл қою сияқты күрделі міндеттердің алдыңғы шебінде тұр. Ал цифрлық дәуір бұл күресті бұрынғыдан да күрделендіріп отыр. Сондықтан Мемлекет басшысының бұл жиындағы сөзі тек өткенге баға беру емес, болашаққа бағытталған нақты бағдар іспетті. Қысқасы, Қаржылық мониторинг агенттігі үшін бес жыл – қалыптасу кезеңі болса, ендігі уақыт – технологиямен ойлайтын, дерекпен шешім қабылдайтын жаңа кезеңнің басталуы.
Пікірлер жоқ. Бірінші болыңыз!