Қазақстан мұсылмандары үшін 2026 жылғы маңызды діни күндердің мерзімі нақтыланды. Қазақстан мұсылмандар діни басқармасының мәліметінше, хижри айлардың басталуы халықаралық астрономиялық зерттеу орталықтарының деректеріне сүйене отырып бекітілген.
Рамазан айы биыл 19 ақпанда басталады. Қасиетті айда мұсылмандар ораза ұстап, рухани тазаруға басымдық береді. Ал мың айдан қадірлі саналатын Қадір түні наурыздың 16-сынан 17-сіне қараған түнге сәйкес келеді.
Ораза айт мерекесі 20 наурызда басталып, дәстүр бойынша үш күнге созылады. Бұл күндері мұсылмандар бір-бірін құттықтап, қайырымдылық жасап, ағайын-туыспен қауышады.
Ал құрбан шалу ғибадатымен ерекшеленетін Құрбан айт мамырдың 27-сі мен 29-ы аралығында өтеді.
Діни басқарма өкілдері мерекелік күндердің алдын ала жариялануы азаматтарға жоспарларын ыңғайлап құруға мүмкіндік беретінін атап өтті. Сонымен қатар аталған күндерге байланысты ресми демалыс тәртібі тиісті мемлекеттік шешімдерге сәйкес айқындалатыны еске салынды.
Пікірлер жоқ. Бірінші болыңыз!