АҚШ-тың кезекті әскери көмегі барысында Украина кассеталы оқ-дәрі алды. Мұны АҚШ қорғаныс министрлігінің өкілі хабарлады.
Бейсенбіде жедел-стратегиялық «Таврия» әскери тобының қолбасшысы Александр Тарнавский Украина әзірге кассеталы оқ-дәрі пайдаланбағанын, бірақ ол «майдан шебіндегі жағдайды түбірінен өзгертуі мүмкін» екенін айтқан.
7 шілдеде АҚШ Украинаға құны 800 миллион доллларға тең жаңа әскери көмек пакетін ұсынған. Кассеталы оқ-дәріден өзге оның ішінде Bradley және Stryker беренкөліктері мен HIMARS снарядтары мен гаубицалар, әуе қорғанысының оқ-дәрілері бар.
Қару-жарақ түрлері:
– 32 дана БМП Bradley мен 32 дана Stryker;
– Patriot пен HIMARS-ке зымырандар;
– AIM-7 әуе қорғаныс жүйесіне арналған зымырандар;
– атыс қаруына арналған 28 млн оқ;
– Stinger мен Javelin-дер;
– 31 дана 155-мм гаубица;
– кассеталық снарядтар (155 мм).
Кассеталық снарядтар нысананы жою үшін бытыраңқы зарядпен атылады (лақтырылады). Яғни, бұл оқ-дәрілер шашырап ұшқаннан соң, бағатталған нысанаға дәл тию көрсеткіші 100 пайыздық деңгейде.
АҚШ президентінің ұлттық қауіпсіздік жөніндегі кеңесшісі Джейк Салливан АҚШ кассеталы оқ-дәрінің барлық қаупін түсінетінін, сол себепті бұл шешімді ұзақ ойланып қабылдағанын айтқан. Алайда Ресей әскері кассеталы оқ-дәріні Украинада қазірдің өзінде қолданып отыр, Украинаның соған тең қарумен қорғануына құқығы бар деген.
Салливанның сөзінше, Украина кассеталы оқ-дәріні мейлінше абайлап қолдануға, бейбіт адамдардың қауіпсіздігіне қатер төндірмеуге уәде берген.
АҚШ-тың Украинаға кассеталы оқ-дәрі беретіні туралы ақпарат шыққан соң Ресей қорғаныс министрі Сергей Шойгу «олай болса біз кассеталы оқ-дәріні пайдалануға кірісеміз» деген еді. Сергей Шойгудың сөзінше, Ресей Украинада әзірге кассеталы оқ-дәрі қолданбаған. Алайда, майдан алаңынан түскен мәліметтер Ресейдің кассеталы оқ-дәрі қолданғанын көрсеткен.
Кассеталы оқ-дәріні қолдануға тыйым салатын халықыралық конвенцияға 123 мемлекет қол қойған.
Кассеталы оқ-дәрі жасайтын ірі өндірістері бар АҚШ, Ресей, Қытай конвенцияға қол қоймаған. Үндістан, Пәкстан, Израиль, Оңтүстік Корея, мен Украина да конвенцияға қол қоймаған.
Пікірлер жоқ. Бірінші болыңыз!