Ұлттың байырғы заманнан бері төл туындысына айналған кестелі, оюлы құрақ көрпе-көрпешелердің нақышы әлі күнге дейін еңселі елдің болмыс-бітімінен сыр шертіп, оның құндылығы жоғары бағалануда. Қолынан оймақ пен инесін тастамай, зейнеттегі уақытын бейнетке жұмсайтын ақ жаулықты аналар үшін бұл негізгі жұмысқа айналуы ұмыт қалған дүниенің жаңғыруымен бірдей десек те болады. Бос уақытын құрақ көрпе тігіп, одан аз-кем пайда тауып жүрген зейнет жасындағылардың қатарында сырдариялық қолөнер шебері Алтын Нұртаева да бар. Бұған дейін 40 жылдан аса бала тәрбиесі мен білім беру саласында қажырлы еңбек еткен зейнеткер бүгінде кестелі көрпе-төсектің түр-түрін тігіп, жаңа үлгідегі сөмке, оюлы қамзол, тақия, шапан сынды дүниелерді дайындаумен айналысып келеді.
– «…Шеше көрген тон пішер». Осы мақалдың төркінін тереңінен түсіндім. Өйткені анам тігінмен айналысқан шебер жан болды. Сол кісіден өмірлік өлмейтін, өшпейтін кәсіп үйрендім. Дегенмен, 41 жыл мектепте ұстаздық қызмет атқарып, бала тәрбиесімен айналыстым, оларға да қыз баласының ине ұстау арқылы нәзік болмысын көркейте алатынын түсіндіріп, тігін өнерін насихаттап жүретінмін. Жалпы, әрбір қазаққа «ұлт, тарих» деген сөзді айтса, көз алдына ең алдымен ою-өрнек, кешегі тоқымалы кілемдер мен текеметтің оралатыны рас. Себебі расында да оның тінінде тарих мен ұлттың негізгі құндылығы жатыр. Сондықтан тігін өнерінде өз қолтаңбамды қалыптастырып, ұлттың ізгі ісін жалғастыруды жөн деп таптым, – деді Алтын апа.
Айтса, айтқандай-ақ. Әрбір адамзаттың төл туындысынан ұлттың ғұрпы мен дәстүрі толық көрініп тұруы керек десе, Алтын Нұртаеваның қолынан шыққан бұйымдарын атап көрсетуге әбден болады. Сырдариядағы сапардан осындағы халықтың көпшілігі киелі өнерден кенде емес екенін ұқтым әрі бейнеткеш халқына ризашылық таныттым.
Алтын апаның әрбір туындысында ерекше талант, шабыт жатыр. Тіпті, кестесі де, құрағы да өзгеше тігілген. Әлбетте, әдемілікпен үйлесім тапқан әрбір дүниеде қазақылықтың иісі шығып тұратынын да байқадық. Оның үстіне арнайы тігін бөлмесіне де көз салып, нағыз қазақ әжелерінің образын қалыптастыратын біраз дүниені байқадық. Тіпті, қарасаң тамсанып, көздің жауын алады. Қатесіз құралған құрақ көрпелер «жастар құрала берсін» деген ойға алып келеді. Бұған дейін бірнеше жерде жеке көрмесін өткізіп, ұлттық өнерді жандандырып келе жатқан ісмерге алғыс білдіріп, ұзақ ғұмыр тіледік.
Қазақ қашанда өз салт-санасын, дәстүр-діңгегін ұлықтайтындарымен дара. Жасампаздықтың келбетін көрсететін білім болса, енді бірі дәстүрді қайта жаңғыртумен жалғасын табады. Сондықтан, әрбір бойжеткен ару ине ұстаған, ержеткен бала аттың жалында ойнаған болса, ұжымаққа жетелейтін тұлғалар осыдан бастау алады.
Ердәулет ҚАЛИ,
Сырдария ауданы
Пікірлер жоқ. Бірінші болыңыз!