Банк клиенттің шотын өз қалауы бойынша бұғаттай алмайды. Қазақстан заңнамасына сәйкес, мұндай шара тек заңда көзделген нақты негіздер болған жағдайда ғана қолданылады, деп хабарлайды Halyqline.kz.
Сот орындаушысының қаулысы шықса
Шотты бұғаттаудың ең жиі кездесетін себебі – орындалмаған қарыз. Егер азаматтың несие, алимент, салық немесе басқа да берешегі өндіріп алу сатысына өтсе, жеке сот орындаушысы немесе мемлекеттік сот орындаушысы банкке шотқа тыйым салу туралы қаулы жібере алады.
Бұл жағдайда банк қаулыны орындауға міндетті.
Сот немесе тергеу органдарының шешімі болса
Қылмыстық іс аясында тергеуші, прокурор немесе сот ақшаға тыйым салу туралы шешім қабылдай алады. Мұндай жағдайда шоттағы қаражатқа уақытша шектеу қойылады.
Күмәнді операциялар анықталса
Егер банк ақшаның заңсыз жолмен алынғанына немесе терроризмді қаржыландыруға, ақшаны жылыстатуға қатысы болуы мүмкін деп күмәнданса, операцияны уақытша тоқтатуға құқылы.
Мұндай кезде банк клиенттен ақша көзін растайтын құжаттарды сұратуы мүмкін.
Құжаттарыңыз ескірсе
Кей жағдайда банк клиенттің жеке басын сәйкестендіру талаптары орындалмаған кезде де шот бойынша операцияларды уақытша шектеуі мүмкін. Мысалы:
- жеке куәліктің мерзімі өтіп кетсе;
- клиент туралы мәліметтер жаңартылмаса;
- заң талаптарына сәйкес қосымша ақпарат қажет болса.
Банктің техникалық қатесі
Өте сирек жағдайда техникалық ақауға байланысты операциялар уақытша тоқтатылуы мүмкін. Әдетте мұндай мәселе қысқа уақыт ішінде шешіледі.
Қандай төлемдерге тыйым салынбайды?
Заң бойынша барлық ақшаға бірдей тыйым салынбайды. Кейбір әлеуметтік төлемдер арнайы қорғалады. Мысалы, жәрдемақылардың және заңда көрсетілген өзге де әлеуметтік төлемдердің жекелеген түрлеріне өндіріп алу қолданылмайды.
Егер шотыңыз бұғатталса не істеу керек?
Ең алдымен банктен шектеудің нақты себебін анықтаңыз. Егер шот сот орындаушысының қаулысы негізінде бұғатталса, берешек туралы мәліметті тексеріп, оны өтегеннен кейін қаулының күшін жою рәсімін бастаған жөн. Ал бұғаттау заңсыз деп есептесеңіз, сот орындаушысының әрекетіне немесе мемлекеттік органның шешіміне шағымдануға құқығыңыз бар.
Заңгерлердің айтуынша, банк өз бастамасымен клиенттің шотын себепсіз бұғаттай алмайды. Мұндай шешімнің барлығы заңмен белгіленген негіздерге сүйенуі тиіс.
Пікірлер жоқ. Бірінші болыңыз!