Алматы тұрғындары мен қонақтары үшін Еуропаға сапарлау мүмкіндігі тағы бір бағытпен толықты. 31 мамырдан бастап Алматы мен Польша астанасы Варшава арасында тікелей әуе қатынасы іске қосылады. Жаңа бағытты Польшаның ұлттық әуе тасымалдаушысы LOT Polish Airlines компаниясы орындайды.
Жаңа рейс Boeing 737 MAX ұшақтарымен жүзеге асырылады. Әуе кемелері Алматы мен Варшава арасында аптасына төрт рет қатынайды. Бұл бағыт Қазақстан мен Еуропа арасындағы әуе байланысын кеңейтіп қана қоймай, туристік және іскерлік сапарларға қосымша мүмкіндік береді.
Алматы әкімдігінің мәліметінше, халықаралық әуе бағыттарын көбейту қаланың басым бағыттарының бірі болып қала береді. Әуе қатынасының кеңеюі шетелдік туристер ағынын арттыруға, халықаралық байланысты нығайтуға және Алматының Орталық Азиядағы іскерлік әрі туристік орталық ретіндегі әлеуетін күшейтуге ықпал етеді.
Соңғы уақытта Алматыдан халықаралық бағыттардың саны артып келеді. Бұған дейін қаладан Шанхай, Пусан және басқа да шетелдік қалаларға жаңа рейстер ашылған болатын. Көлік министрлігі биыл Қазақстаннан тағы бірнеше халықаралық бағытты іске қосу жоспарланып отырғанын хабарлаған еді. Солардың қатарында Алматы – Варшава бағыты да бар.
Жаңа рейстің ашылуы Польша арқылы Еуропаның өзге елдеріне қатынауды да жеңілдетеді. Варшава халықаралық әуежайы Еуропадағы ірі транзиттік хабтардың бірі саналады. Осы арқылы қазақстандық жолаушылар Германия, Франция, Ұлыбритания, Италия және басқа да елдерге қосымша рейстер арқылы жетуге мүмкіндік алады.
Мамандардың айтуынша, тікелей әуе қатынасының пайда болуы Қазақстан мен Польша арасындағы туризмнің, бизнес байланыстардың және мәдени-гуманитарлық ынтымақтастықтың дамуына да оң әсер етуі мүмкін. Сонымен қатар бұл бағыт Еуропаға сапарлайтын қазақстандықтар үшін жол уақытын қысқартып, қолайлы балама ұсынады.
Пікірлер жоқ. Бірінші болыңыз!