Air Astana әуе компаниясы Алматы мен Астанадан Мысырдың Шарм-эш-Шейх курортына тұрақты рейстер орындауды жоспарлап отыр, деп хабарлайды Halyqline.kz.
Жаңа кестеге сәйкес, Алматыдан алғашқы тұрақты рейс 10 желтоқсанда, ал Астанадан 11 желтоқсанда ұшады. Бұған дейін қазақстандық туристер аталған демалыс орнына негізінен чартерлік бағдарламалар арқылы қатынап келген.
Алматыдан Шарм-эш-Шейхке ұшақтар аптасына екі рет, дүйсенбі және бейсенбі күндері қатынайды. Ал елордадан рейстер сейсенбі және жұма күндеріне жоспарланған. Осылайша, екі қаладан Мысыр курортына аптасына төрт тұрақты рейс орындалмақ.
Шарм-эш-Шейх Қызыл теңіздің жағалауында орналасқан танымал туристік бағыттардың бірі. Курорт жылы климатымен, жағажайларымен және маржан рифтерімен ерекшеленеді. Әсіресе қыс мезгілінде теңіз жағасында демалуды қалайтын туристер арасында сұранысқа ие.
Айта кетейік, Air Astana бұған дейін де аталған бағытта чартерлік тасымалдарды жүзеге асырған. Рейстердің тұрақты кестеге көшуі жолаушыларға сапарларын туристік пакеттерден бөлек жоспарлауға мүмкіндік береді.
Пікірлер жоқ. Бірінші болыңыз!