Италияның Турин қаласында өткен XXXll дүниежүзілік қысқы Универсиада ойындарында Қазақстан құрамасы жалпы есепте 12-орынмен аяқтады, – деп хабарлайды halyqline.kz тілшісі Stan.kz ақпарат агенттігіне сілтеме жасап.
32-ші қысқы Универсиада ойындарында Қазақстан құрамасы сапынан спорттың 10 түрінен 103 спортшы қатысты. Қаңтардың 13-і мен 23-і аралығында өткен дүбірлі додада ел құрамасы 14 медаль иеленді. Жүлде саны бойынша бұл Қазақстанның Универсиада тарихындағы екінші үздік нәтижесі. Бұған дейін отандастарымыз 2017 жылы Алматыда өткен байрақты бәсекеде 36 медаль жеңіп алған еді.
Туриндегі турнирде Қазақстан спортшылары 3 алтын, 4 күміс және 7 қола жүлде иеленді. Ел қоржынына фристайлшы Анастасия Городко қос алтынды салса, биатлоннан Никита Акимов әнұранымызды Турин төрінде бір рет шырқатты.
Дүниежүзілік қысқы ойындар ашылуында көк туымызды ұстап шыққан Аяулым Әмренова параллель могулдан күміс жүлде иеленсе, ерлер арасынан дәл осы сайыста Антон Бондаревте күміспен күптелді. Универсиада бағдарламасына тұңғыш рет енген парашаңғы спорт түрінде Денис Зинов қос күмісті олжалады.
Денистен бір саты төмен нәтиже көрсеткен парашаңғышы Роман Құрбановта қос медаль еншіледі. Отандасымызға бұйырғаны 2 қола медаль. Ал мәнерлеп сырғанаудан күтпеген нәтиже тіркеген Софья Самоделкина да қола жүлдеге қол жеткізді. Шыны керек, бұл қоланың Қазақстан үшін орны алтынмен пара пар. Сондай-ақ, қолаға қол созғандар арасында биатлоншылар Арина Крюкова мен Кирил Бауэр бар.
Командалық сайыста шорт-тректен Қазақстан құрамасы қола медаль иеленді. Құрамында: Алина Әжіғалиева, Валерий Клименко, Дінмұхамедалдияр Тәжібай, Малика Ермек сынды спортшылардан құралған біздің команда аралас эстафетадан жүлдегерлер қатарына қосылды. Және шорт-тректің 5000 метрлік бағдарламасында Дінмұхамедалдияр Тәжібай, Валерий Клименко, Айбек Темірхан, Санжар Жанысов, Әлішер Абдулкатимовтен құралған ерлер командасы да қола медаль жеңіп алды.
Осылайша, әлемнің 46 елі қатысқан байрақты бәсекені Қазақстан құрамасы жалпы есепте 12-орынмен аяқтады. Екі аптаға созылған дүниежүзілік қысқы Универсиада ойындарында Франция (18 алтын, 8 күміс, 14 қола) бірінші орынды иеленсе, Оңтүстік Корея құрамасы (8-6-6) екінші орынға тұрақтады. Үздік үштікті Финляндия (8-3-4) түйіндеді.
Жалпы жүлделер саны бойынша Қазақстан құрамасы 14 жүлдемен 7-орынға жайғасты. 40 медальді иеленген Франция бұл жақта да көш басында. Ал 23 жүлдені ұтқан Германия екінші сатыға орналасса, үздік үштікте 20 медальмен Оңтүстік Корея.
Дүниежізілік қысқы Универсиада ойындарына Қазақстан құрамасы тәуелсіз ел ретінде 1993 жылдан бері қатысып келеді. Осы уақытқа дейін дүбірлі додаға мемлекетіміз 16 рет қатысып барлығы 114 жүлде ұтқан. Оның 39-ы алтын, 33-і күміс, 42-сі қола медаль.
Ендеше, осыған дейінгі Қазақстан құрамасының дүниежүзілік қысқы Универсиада ойындарында көрсеткен нәтижелері мынадай:
1993 жыл. Закопане (Польша). Қазақстан 1 күміс. Жалпы есепте 16-орын.
1995 жыл. Хака (Испания). 2 алтын, 1 қола. 8-орын
1997 жыл. Муджу (Оңтүстік Корея). 1999 жыл. Попрад (Словакия). 2001 жыл. Закопане (Польша). Бұл жылдары бәсекеде Қазақстан бірде-бір жұлде еншілей алмады.
2003 жыл. Тарвизио (Италия). 2 алтын, 2 күміс, 2 қола. 10 орын.
2005 жыл. Инсбурк (Австрия). 4 алтын, 1 күміс, 2 қола. 7-орын.
2007 жыл. Турин (Италия). 2 алтын, 1 күміс, 2 қола. 13-орын.
2009 жыл. Харбин (Қытай). Бұл жылы да Қазақстан медальсіз қайтты.
2011 жыл. Эрзурум (Түркия). 1 алтын, 5 қола. 17-орын.
2013 жыл. Трентино (Италия). 2 алтын, 2 күміс, 1 қола. 15-орын.
2015 жыл. Гранада (Испания) және Штрбске Плесо (Словакия). 5 алтын, 6 күміс. 3-орын.
2017 жыл. Алматы (Қазақстан). 11 алтын, 8 күміс, 17 қола. 2-орын.
2019 жыл. Красноярск (Ресей). 4 күміс, 3 қола. 17-орын.
2021 жыл Люцерн (Швейцария). Пандемияға байланысты болған жоқ.
2023 жыл. Лейк-Плэсид (АҚШ). 3 алтын, 4 күміс, 4 қола. 11-орын.
2025 жыл. Турин (Италия). 3 алтын, 4 күміс, 7 қола. 12-орын.
Осылайша, студенттер үшін жылдың басты бәсекесі аяқталды. Халықаралық студенттік спорт федерациясы (FISU) келесі 2025 жылы өтетін дүниежүзілік қысқы Универсиада ойындарының өтетін жері әзірге белгісіз екенін айтты.
Пікірлер жоқ. Бірінші болыңыз!