Қазақстанда цифрлық платформалар арқылы жұмыс істейтін курьерлер мен такси жүргізушілерінің құқықтарын қорғау мәселесі Сенат деңгейінде көтерілді. Сенатор Бибігүл Жексенбай платформалық жұмыспен қамту саласына қатысты арнайы заң қабылдауды ұсынып, курьерлер мен таксистер үшін ең төменгі сағаттық төлем енгізу қажет екенін айтты. Сонымен бірге платформалар тапсырыстарды қалай бөлетінін ашық көрсетуі керек деген талап та айтылды.
Бұл бастама соңғы жылдары саны күрт артқан платформалық жұмыспен қамту саласын құқықтық тұрғыдан реттеуге бағытталған. Себебі көптеген азамат дәл осы агрегаторлар арқылы табыс тауып жүргенімен, олардың еңбек кепілдігі, сақтандыруы, табыс тұрақтылығы мен әлеуметтік қорғалуы толық шешілмеген. Ұсыныс қабылданса, бұл саладағы адамдардың еңбек құқығын нақтылауға, табысын тұрақтандыруға және цифрлық экономиканың жаңа форматына бейімделген құқықтық тетік қалыптастыруға жол ашуы мүмкін.
Пікірлер жоқ. Бірінші болыңыз!