HALYQLINE.KZ Ол Қазақстанға маусымдық жұмыс істеуге бір жыл рұқсат мерзіммен келген болатын.
Өзбекстандағы ауылында жұмыс көзі болғанымен, жанұясын материялдық жағынан қамтамасыз етуге жетпеді.
Отбасында науқас анасы, үш бауыры, әйелі мен ұлы бар. Досының Қызылордада тұратын танысы базар маңында тандыр нан сататын сауда орнын ашатындығын айтып, бұл екеуін шақыртқан болатын.
Жататын орны, тамағы тегін болды. Ай сайынғы табысын әйеліне жіберіп тұрды. Шетел азаматы ретінде, барлық тексеріс талаптарына сай, еш заң бұзбастан, алаңсыз жұмыс істеп жатты.
Бірақ, бір кештегі ойланбай жасаған әрекеті, оны қылмыскер атандырып, темір тордан бір-ақ шығарды.
«Сол күні менің жанымдағы бірге жұмыс істейтін Ғ-ның дос келіншегі бізді туған күніне шақырды. Күнделікті бір сарынды жұмыстан шаршап кеткен соң, біраз көңілімді көтерейін деп, келісе кеттім. Барсақ, дастарқан басына бес-алты жан ғана жиналыпты. Ішіп-жеп, танысып білістік. Біраз отырған соң, ащы суды көп сілтеп қойдым ба, көзім бұлдырап, басым айналды. Қарасам, қасымда теріс қарап, кішкентай сары қатын отыр. Басқа ешкім жоқ. Ол да масаңдау екен. Шайтан ой түртіп, қылымсыған сары келіншекті өзіме қарай тарттым. Қарсыласып еді, еркектік күшімді қолдандым.
Екі күн өткен соң, базардағы жұмыс орныма құқық қорғау қызметкері келіп, менің үстімнен С. деген азаматшадан зорлау фактісі бойынша арыз түскендігін айтып, жауап алу үшін өздерімен бірге баруымды сұрады. Мен өз кінәмді бірден мойындадым. Жасаған қылмысым үшін сот үкімімен ҚР ҚК-тің 120 бабының 1-бөлігі бойынша 5 жылға басбостандығымнан айырылдым. Осылайша, нәпақа табамын деп, келіп нәпсінің құлы болдым. Аз күндерден соң бостандыққа шығамын. Әйелім мені кешірді. Бес жыл бойы артымнан келіп-кетіп тұрды. Балама, туыстарыма Қазақстанда жұмыс істеп жүр деп жасырып келіпті. Еліме оралған соң, отбасымды қуантып өмір сүремін. Алдағы уақытта жақындарымды ұятқа қалдыратын іс-әрекетке бармаспын деп ойлаймын«.
Пікірлер жоқ. Бірінші болыңыз!