Қазақстан мен Түркия арасындағы қарым-қатынас енді бұрынғыдай тек бауырлас елдер арасындағы мәдени-тарихи жақындықпен ғана өлшенбейді. Соңғы жылдары екі елдің байланысы нақты экономикалық, инвестициялық, көлік-логистикалық және технологиялық мүдделерге негізделген прагматикалық серіктестікке айналып келеді.
14 мамырда Астанада Қазақстан Президенті Қасым-Жомарт Тоқаев пен Түркия Президенті Режеп Тайип Ердоған келіссөз жүргізіп, екі ел арасындағы ынтымақтастықтың жаңа кезеңін талқылады. Кездесу барысында Қазақстан мен Түркия арасындағы сауда айналымын 15 млрд АҚШ долларына жеткізу мақсаты тағы да айтылды. Егер тараптар нақты жобаларды іске асыра алса, Қазақстан үшін Түркия Еуропа, Таяу Шығыс және Жерорта теңізі бағытындағы маңызды экономикалық көпірге айналады.
Түркия қазірдің өзінде Қазақстандағы ең белсенді инвесторлардың бірі саналады. Екі елдің байланысы құрылыс, медицина, фармацевтика, білім, логистика, ауыл шаруашылығы және цифрлық технологиялар саласында кеңейіп жатыр. Әсіресе, Орта дәліз бағытының маңызы артып тұрған шақта Қазақстан мен Түркияның жақындасуы аймақтық саясат үшін де, халықаралық сауда үшін де маңызды.
Бұл сапардың басты ерекшелігі – тараптардың символикалық мәлімдемелермен шектелмей, нақты экономикалық жобаларға басымдық беруінде. Қазақстан үшін Түркия капиталы мен тәжірибесі өңдеу өнеркәсібі, медицина және инфрақұрылым саласына қажет болса, Түркия үшін Қазақстан Орталық Азиядағы ең тұрақты әрі ірі нарықтардың бірі болып отыр.
Пікірлер жоқ. Бірінші болыңыз!