Қазақ қызы қашанда сұлулығымен ғана емес, ісмерлігімен, талғампаздығымен дараланған. Бүгінгі заманның қыз-келіншектері де осы дәстүрлі болмысты жаңа қырынан жалғап келеді. Олар бір қолымен бесікті тербетсе, бір қолымен кәсібін дөңгелетіп, ұлттық құндылықты заманауи үлгіде дәріптеуді мақсат тұтады. Сән әлемінде де қазақы нақышқа деген қызығушылық артып, оюлы өрнек пен табиғи материалға сұраныс көбейді. Әсіресе, нәзік жандылардың сәнін кіргізетін әшекей бұйымдар арқылы ұлттық болмыс жаңаша сипат алып отыр. Осындай талғам мен табандылықты қатар ұштастырып жүрген жас кәсіпкердің бірі – сырбойылық Ақбота Шамшиева.
Небәрі 23 жастағы Ақбота Сеилханқызы – экономика ғылымдарының магистрі. Қазіргі уақытта «Анаға тағзым» орталығында әдіскер болып еңбек етеді. Негізгі қызметінен бөлек, ол ұлттық нақыштағы заманауи әшекей бұйымдарын жасап, шағын кәсібін қалыптастырып келеді. Бала кезінен шығармашылыққа жақын болған бойжеткеннің қолөнерге деген қызығушылығы 2023 жылы орталық қабырғасында өткен «Брендке бір қадам» көрмесінен кейін айқындала түскен.
– Сол көрмеден кейін өзіме жаңа бағыт іздей бастадым. Өңірімізде заманауи стиль мен ұлттық нақышты үйлестірген әшекейлер аз екенін байқадым. Ал үлкен қалаларда мұндай бұйымдар бар, бірақ бағасы қымбат. Содан сапалы әрі қолжетімді этно-бұйымдарды өз қаламызда жасағым келді, — дейді жас шебер.
Бұл – жай ғана қызығушылықтан туған ой емес, нарықты зерделеп, сұранысты саралаған сауатты шешім. Экономикалық білімі мен шығармашылық қабілетін ұштастыра білген Ақбота өзінің алғашқы туындысы – этно сотуар арқылы тың бастама жасады. Бұл бұйым кейін «ethnoshine.kzo» деп аталатын шағын брендтің негізіне айналды.
Жас шебердің басты ерекшелігі – керамикамен жұмыс істеуі. Керамика – нәзіктікті де, төзімділікті де талап ететін материал. Оған жан бітіріп, сәндік бұйымға айналдыру – үлкен шеберліктің белгісі. Сонымен қатар табиғи тастар мен сапалы оюлы фурнитура қолданады. Әр бөлшекке мұқият қарап, сапаны бірінші орынға қояды.
– Әр бұйымды қайталамауға тырысамын. Маған эксклюзивтілік маңызды. Сапасы жоғары, сәнін ұзақ уақыт жоғалтпайтын әшекей жасау – басты мақсатым, — дейді Ақбота.
Бір этно сотуарды жасауға шамамен 1-1,5 сағат уақыт кетеді. Алайда әр бұйымның артында тың идея мен мұқият ойластырылған үйлесім жатыр. Түстердің жарасымы, форманың нәзіктігі – барлығы да қыз-келіншектердің талғамына сай болуы тиіс. Бастапқыда хобби ретінде басталған іс бүгінде қосымша табыс көзіне айналған. Сұраныс та жоғары. Әсіресе, мереке қарсаңында тапсырыс көбейеді.
Өнімдерін негізінен инстаграм желісіндегі парақшасы арқылы сатады. Сондай-ақ, ARAY CITY MALL сауда орталығында ұйымдастырылатын «Брендке бір қадам» көрмесіне қатысып, жергілікті кәсіпкер әйелдердің қатарында өз туындыларын көпшілікке ұсынып жүр.
Ақботаның бойынан қазақ қызына тән ұяңдықпен қатар іскерлік пен табандылық анық байқалады. Ол бәсекелестіктен қорықпайды, керісінше, оны даму құралы деп санайды. Мемлекеттік гранттарға әзірге қатыспаса да, алдағы уақытта кәсібін кеңейтіп, жеке шеберхана ашуды жоспарлап отыр. Бұл – арманы асқақ, мақсаты айқын жастың нақты жоспары.
– Қолөнер – қазақ мәдениетінің терең тамыры. Әр оюдың өз тарихы, мағынасы бар. Мен үшін ұлттық мұраны заманауи форматта ұсыну – үлкен миссия. Жастар қазақы әшекейді тек мерекеде емес, күнделікті өмірде де тағатын деңгейге жетсек деймін, — дейді жас кәсіпкер.
Шынында да, Ақботаның еңбегінде жай ғана кәсіпкерлік емес, ұлттық санаға қызмет ету ниеті бар. Ол сән арқылы салтты сөйлеткісі келеді, әшекей арқылы тарихты жаңғыртқысы келеді. Осындай талпыныс нағыз рухани жаңғырудың бір көрінісі емес пе?!
Бүгінгі қазақ қызы – білімді, батыл, бастамашыл. Ол тек армандап қана қоймай, әрекет етеді. Ақбота Шамшиева – сол жаңа буынның жарқын өкілі. Нәзік қолымен керамикаға жан бітіріп, ұлттық өрнекті заманауи сәнге айналдырып жүрген оның еңбегі құр мақтауға емес, шынайы құрметке лайық.
Қыз-келіншектер үшін әр әшекей – өзін-өзі танытудың бір жолы. Ал Ақботаның туындылары – сол өзіндік болмысты қазақы нақышпен айшықтайтын ерекше дүние. Мұндай жас кәсіпкерлер көбейсе, ұлттық өнердің де өрісі кеңейері сөзсіз. Себебі сұлулыққа іңкәр, рухына адал қазақ қызы барда қолөнердің де, мәдениеттің де шамшырағы сөнбейді.
Оразкүл ТЕМІРҒАЛИ
Пікірлер жоқ. Бірінші болыңыз!