«ПетроҚазақстан» компаниясы тек қара алтын өндіріп қоймай, мұқтаж жандарға ұдайы көмектесуден, сондай-ақ спорттық іс-шараларға белсене араласып, саламатты өмір салтын насихаттаудан тайынған емес. Тамыздың 25-і күні «ПетроҚазақстан» ұжымы арасындағы спартакиаданың жабылу салтанаты өтті. Қорытынды кеште спорттық ойындарда жеңіс тұғырынан көрінген мамандар марапатталды. Спартакиада ойындары сондай-ақ, Қазақстан мұнайының 125 жылдығына және мұнай-газ мамандарының кәсіби мерекесімен қатар ұйымдастырылды.
3 тамызда бастау алған спартакиадаға бас-аяғы 12 команда, спорттың 9 түрінен өзара сынға түсті. Атап айтқанда, сала мамандары шахмат, тоғызқұмалақ, үстел теннисі, арқан тарту, жүзу, волейбол және шағын футбол бойынша бақ сынасып, жүлделерді сарапқа салды. Командалар арасындағы бәсекелестік жоғары деңгейде өтіп, әр қатысушының қажырлы еңбегі мен жеңіске деген құлшынысы айқын көрінді. Тағы айта кететін жайт, жарысқа «ПетроҚазақстан» мамандары ғана емес, «ТұзкөлМұнайГаз Операйтинг» ЖШС қызметкерлері де қатысты. Нақтылап айтсақ, V спартакиадада «Құмкөл Мұнай және газ өндіру цехы», «Газды пайдаға жарату цехы», «ҚАМ Мұнай және газ өндіру цехы», «Кеніштегі өндіру технологиясы бөлімі», «Технологиялық бөлім», «Материалдық ресурстар басқармасы», «Қаржы департаменті», «Өндірістік қызметтер», «Геология, өндіру және игеру», «Қауіпсіздік. Құрылыс. Әкімшілік», «ТұзКөлМұнайГаз Оперейтинг кен орны мен кеңсесі» командалары жарыстың көркін келтірді. Марапаттау рәсімі басталмас бұрын мекеме вице-президенті Болат Көшербаев құттықтау сөз сөйледі.
– Құрметті әріптестер, Конституция күніне сәйкес, сондай-ақ Қазақстан мұнайының 125 жылдығына орай ұйымдастырылған спартакиаданы қорытындылап отырмыз. Мұндай спорттық іс-шараларды ұйымдастырудағы басты мақсат – ұйымшылдық. Барша жүлдегерді құттықтаймыз, ал жүлдеге ілінбей қалғандарға келесі жарыстарда сәттілік тілейміз!, – деді ол.
Негізінде, «мұнай өнеркәсібі – ерлерге арналған жұмыс» деген таптаурын бар. Десек те, мұнай саласына нәзікжандылардың қосқан үлесі де аз емес. Биылғы V спартакиадада әйелдер де ерлігімен, өжеттілігімен көзге түсті. Сол себепті, алғашқы болып спорттық ойындарға қатысқан арулар марапат биігінен көрінді. Нақтырақ айтқанда, спартакиадаға ерекшеленген әрбір қызметкер аруға «Ыдыстар үйінің» 5000 теңге сертификаты берілді.
Артынша әр спорт түрі бойынша жекелей сында топ жарған қатысушыларға диплом мен естелік сыйлық табыс етілді. Әр спорт түрі бойынша үшінші, екінші және бірінші орын алғандарға бағалы сыйлықтар мен арнайы диплом берілді.
Атап айтқанда, шахмат ойындары бойынша ерлер арасында Қанат Күлімғалиев және Әділет Өтегенов үшінші орынмен, Бақытғали Қобландиев екінші орынмен, Нұрлан Қуанышбайұлы бірінші орынмен марапатталды. Ал әйелдер арасында үшінші орынды Айнұрлы Ибраева, екінші орынды Тұмаркүл Әбенова, бірінші орынды Гүлмира Болатқызы еншіледі.
Қазақтың ұлттық әрі интеллектуалды ойыны тоғызқұмалақ бойынша да мұнайшылар сынға түсті. Ерлер арасында үшінші орынға Ғабит Жәкебаев лайық деп танылса, екінші орынмен Айдос Мақашев марапатталды. Ал жеңіс тұғырынан Абдықадыр Дүйсенбекұлы көрінді. Әйелдер арасындағы бақталаста үшінші орынды Шолпан Қуанышбекқызы, екінші орынды Ақмарал Құтыбаева иеленді. Ал оза шапқан Жанат Ибрахимова бірінші орын алды.
Үстел теннисі бойынша ерлер арасында үшінші орынға Лю Цзянбо, екінші орынға Александр Ким жайғасты. Бірінші орынды Нұрлан Рысқұлов қанжығалады. Әйелдер арасында өткен турнирде үшінші орынмен Салтанат Есжанова марапатталды. Екінші орын Ғалия Шембоковаға, ал бірінші орын Сәрсенкүл Сыздықоваға бұйырды.
Бүгінде олимпиадалық спорт түріне енуі мүмкін армрестлинг, қазақша айтқанда қол күрестен де мекеме қызметкерлері бақ сынасты. 80 келіден аса салмақ дәрежесіндегі ерлер бөлек, 80 келіге дейінгі салмақтағы ерлер бөлек білек айқастырды. Бірінші салмақ дәрежесінде Руслан Әділбекұлы үздік саналды. Ал 80 келіге дейінгі салмақта Бауыржан Бақытжанұлының мерейі үстем болды. Қол күресінен әйел азаматшалар да қалыс қалған жоқ. Мұнда 65 келіден астам салмақ дәрежесінің бірінші сатысына Марина Кашечкина жайғасса, 65 келіге дейінгі салмақтың бірінші орынын Жанар Сапарбекова алды.
Жүзіп жарысқандар арасында «ҚАМ мұнай газ және өндіру цехынің» қызметкері Сәкен Өтебаев қарсыластарына шаң ілестірген жоқ. Екінші орынды Нұрбол Тәжібаев қанағат тұтса, үшінші орын Жетес Құлмағамбетовке бұйырды. Әйелдер арасында болған дисциплиналық жарыста Анастасия Олеговна үздік шықты. Екінші орын мен үшінші орынды Людмила Алымова мен Оксана Черникова бөліп алды.
Жекелей сында осындай нәтиже тіркелді. Кейінірек топтық сында оза шапқандар марапат биігіне көтерілді. Волейбол және кіші футбол спорт түрлері бойынша үздік үштікке ілінген командалар үшінші орын үшін 80 000 теңге, екінші орын үшін 120 000 теңге, ал бірінші орын 160 000 теңге қанжығалады. Волейбол ойындары бойынша үшінші орынмен «Газды пайдаға жарату цехы» командасы, екінші орынмен «Технологиялық бөлім» командасы, бірінші орынмен «Кеніштегі өндіру технологиясы» командасы марапатталды. Шағын футболдан «Материалдық ресурстар басқармасы» командасы 3-орынды алса, екінші орынмен «ТұзкөлМұнайГаз Оперейтинг кеңсе» командасы, бірінші орынмен «Геология, өндіру және игеру» командасы марапатталды.
Біршама уақытқа созылған спорт маусымы осылайша тамамдалды. Қорытынды кеш соңында жалпы командалық есеп бойынша алғашқы үштіктің ұпайы анықталып, жүлдегер команданың әрбір мүшесіне медальдар табысталды. Қорытынды есепте 121 ұпай жинаған «Құмкөл мұнай және газ өндіру цехы» командасы үшінші дәрежедегі жүлдегер атанды. Екінші орын 131 ұпай еншілеген «Материалдық ресурстар басқармасы» командасына бұйырды. Бірінші орынды сан түрлі спорт бойынша сынға түсіп, үздік нәтиже көрсете білген «Қаржы департаменті» командасы иеленді.
Спорт мамандық талғамайды. Жыл сайын өтетін мұнайшылар арасындағы спартакиада – соның бірден-бір дәлелі. Осы шамадағы үлкен-кіші жарыстар өзге сала мамандары арасында да жиі ұйымдастырылып, саламатты өмір салтын ұстану трендке айналады деген ойдамыз.
Айтілес ЖАЙШЫЛЫҚ
Суретті түсірген Андрей ТАЙГУНОВ
Пікірлер жоқ. Бірінші болыңыз!