Куруглиев Могомед Чихибубаевич 1974 жылы 16 қаңтарда РФ Дағыстан Республикасы, Хива облысы, Цнал ауылында дүниеге келген.
Еркін күрестен ҚР еңбек сіңірген спорт шебері Могомед Куруглиев Атланта-1996, Сидней-2000, Афина-2004 жж үш олимпиадаға қатысып, жүлдеге іліне алмады. ҚР еңбек сіңірген жаттықтырушысы М.Куруглиев Ақтау қаласында тренер болып істейді.
Муталимов Марид Камильевич 1980 жылы 22 ақпанда РФ Дағыстан Республикасы,Махачкала қаласында туған.
Еркін күрес шебері Марид Муталимов Афина-2004, Пекин-2008 олимпиадаларына қатысып, Афинада төртінші болды. Ал Пекин олимпиадасында қола медаль алды. Олимпиададан оралған соң ҚР еңбек сіңірген спорт шебері М.Муталимов Ресейге көшіп кетті.
Ниязымбетов Әділбек Сәбитұлы 1989 жылы 19 мамырда Өзбекстан Республикасы, Қарақалпақстанның Нүкүс қаласында туған. Бокстан ҚР еңбек сіңірген спорт шебері Ә.Ниязымбетов Лондон-2012 мен Рио-2016 жж екі олимпиадаға қатысып, екеуінде де күміс алды. Ә.Ниязымбетов 2012 ж «Құрмет» орденін, 2016 ж «Барыс» орденін, 2016 ж «Дарын» мемлекеттік сыйлығын алды. 2018 ж «Маңғыстау облысының құрметті азаматы» атанды.
Қазіргі кезде Ә.Ниязымбетов – Маңғыстау облыстық бокс бойынша олимпиадалық резервтің мамандандырылған балалар мен жасөспірімдер мектебінің басшысы.
Абдрахманов Берік Есенұлы 1986 жылы 20 маусымда Ақтөбе облысында туған. Бокстан халықаралық дәрежедегі спорт шебері Берік Абдрахманов Рио-2016 олимпиадасына қатысып 17-орын алды. 2018 жылы Б.Абдрахманов бокстағы мансабын аяқтап, жаттықтырушы болып кетті.
Нұрдәулетов Бекзад Жалғасбайұлы 1998 жылы 10 сәуірде Түрікменстан Республикасында дүниеге келген. 1999 жылы Бекзат әке-шешесімен Маңғыстау облысы Жаңаөзен қаласына көшіп келді.
Бокстан ҚР еңбек сіңірген спорт шебері Бекзад Нұрдәулетов Токио-2020 олимпиадасына қатысып, 9-орынға ие болды. Қазір Б.Нұрдәулетов кәсіпқой және әуесқой бокста өнер көрсетіп жүр.
Биыл өткен Париж-2024 олимпиадасына Маңғыстаудан бірде-бір спортшы қатыспады. Келесі 2028 жылы Америкада болатын Лос-Анджелес олимпиадасына Маңғыстаудан кім қатысады екен?
Біздің мақсатымыз жершілдік емес. Базалық тұрғыда біршама дайын болып келген спортшыларды ғана жарыстарға тартып, нәтиже көрсетуді қанағат тұтпаймыз. «Бапкерлеріміз неге болашақ батырларды бала кезінен баулымайды?» деген сұрақ ойландырады.
Айбек МҰХАНОВ
Пікірлер жоқ. Бірінші болыңыз!