Бүгінгі сатира
Бүгінде бай–бағландар ойларына келгенін істеп тайраңдап жүр, ал біздің ауылға
акулалар қаптап, «сайрандап» жүр… Жарайды, жантақ жегендей саспайын, бәрін
басынан бастайын. Мойынқұмдық Мыжбан деген бір миллиардердің фазендасында 11
мың мөңіремесі, (сиырлары) жеті мың кісінемесі (жылқысы) мыңдай қорсылдамасы
(шошқалары) екі жүз ақырмасы (есектері) бар екен. Оның кісілігін күйдіріп тастайтын
от жоқ, қорқытатын сот жоқ, өзі паң, түк емес оған заң… Ауыл тұрғындарының
арызымен миллиардерге жолықтым, шыны керек, кеңсеме шақыртуға қорықтым.
– Қырғызстаннан бастау алатын Шу өзенін тас, топырақпен бөгеп, фазендаңызға бұрып
алыпсыз, қайраңға шыққан балықтарды балғамен ұрып алыпсыз, Созақтан сыңсылап
келгендерге «сендерді көргім келмейді!» деп, тұрып алыпсыз…
– Кемсеңдеп жылайын деп тұрған, түртіп қалсам, құлайын деп тұрған сен кімсің?
– Жуантөбе ауылының әкімі едім…
– Су ресурстары министрі болсаң да, аулақ жүр, өзім білемін!
«Кімді айтсаң, сол келеді» демекші, ұшақпен су ресурстары министрінің келе
қалғаны. Жанында нөкерлері.
– Мыжбан Майтабанұлы мырза, тағы бір фазендаңызға Американың батысындағы
Тынық мұхиттан бұрып алыпсыз! Президенті Трамп тоңқылдап, талып қалыпты. Дереу
тоқтатыңыз! Бізге нота жіберді, нота!
– Трамп музыкант па? Нота жібергені несі?–деп қалды миллиардер.
– Наразылық нотасы!
– Алдымен, музыкалатып нота жібергенше, менімен хабарласса болады ғой…
– Жұрт ауылда акулалар жүр дейді, – деді министр міңгірлеп, – қорадағы қойларға
шабуылдап, екі әйелді кір жуып отырған жерінен жұтып қоя жаздапты.
«Ауылда акулалар жүр» деген сөзге таңданып, ауызым ашылып қалыпты. Сөйтсем,
Тынық мұхиттан ағып келген акулалар ауылға шоршып түсіп, білгендерін істеп,
шоршып түсіп, қайтадан көлге кетеді екен. Миллиардердің айтуына қарағанда, оның
шақыруымен кит келе жатқан көрінеді. Не керек, оған министрдің де әлі келмеді.
Халықаралық жанжал туып кететін болған соң, Тынық мұхиттан су жыруды доғарып,
өзіміздің Балқаш көліне бас салды. Фазендасына қарай канал қазу басталды. «Мұныңыз
қалай?» деген облыс әкіміне: «Көл бір орында тұра берсе, сасып кетеді, балықтары
орман-тоғайларға қашып кетеді» деп ақталды. Тіпті ол Каспий теңізінен су жырып
алуға шақ қалды. Ресей президентінің көңілінде «қазақтар қатырады» деген дақ қалды…
Айтпақшы, Мыжбан сияқты бір миллионер ешкімге айтпай, Шардара су қоймасынан
труба тартып, фазендасындағы жасанды көліне бұрып алыпты! Шымкенттің бір байы
Арыс өзенін бөгеп, Шаянға қарай бұрып жіберіпті. Облыс әкімі әкіреңдеген екен:
«Шаяндағы нағашыларыма қайықпен барғым келеді!» деп, басына басымен ұрып
жіберіпті. Әсіресе, жерлері сортаңға айналған созақтықтар былай әндетіп жүр
дейді:
Шудың бойынан, балық іздедім,
Бәрі ойымда, үміт үзбедім,
Канал жағалап, жүгіргенімде,
Сайрап жатты ғой, менің іздерім!
Ауыздары қисық, мисық болса да, байлардың балалары сөйлесін!
Мұхтар Шерім
Пікірлер жоқ. Бірінші болыңыз!