Ғалымдар Жерге жақындайтын ірі астероидтардың қозғалысын алдын ала болжауға тырысқанымен, олардан қорғанудың толыққанды жүйесі әлі қалыптаспаған. Бұл туралы Ресей ғылым академиясының Ғарыштық зерттеулер институтының ғылыми жетекшісі Лев Зелёный мәлімдеді, деп хабарлайды Halyqline.kz РИА Новости агенттігіне сілтеме жасап.
Ғалымның айтуынша, Жерге жақындайтын ірі ғарыш денелері жиі кездеспейді. Дегенмен олардың қозғалысын үздіксіз бақылау, орбитасын есептеу және ықтимал соқтығысу қаупін алдын ала анықтау адамзат үшін маңызды міндеттердің бірі болып отыр.
— Ірі астероидтар жиі кездеспейді. Сондықтан әріптестеріміз олардың Жерге жақындауын алдын ала болжауға және зерттеуге ұмтылып жатыр. Бұл дұрыс бағыт. Алайда әзірге олармен қалай күресу керектігін толық білмейміз, – деді Лев Зелёный.
Астероидтар Күнді айнала қозғалатын шағын аспан денелеріне жатады. Олардың көлемі бірнеше метрден жүздеген шақырымға дейін жетуі мүмкін. Ал Жерге жақындайтын астероидтар деп орбитасының Күнге ең жақын нүктесі Жер мен Күн арақашықтығының 1,3 есесінен аспайтын денелерді атайды.
NASA жіктемесіне сәйкес, диаметрі шамамен 140 метрден асатын және орбитасы Жер орбитасына 7,5 миллион шақырымнан жақындай алатын астероидтар ықтимал қауіпті нысандар қатарына енгізіледі. Алайда мұндай санатқа жатқызылуы аспан денесінің міндетті түрде Жерге соғылатынын білдірмейді.
Ғалымдар әсіресе диаметрі бір шақырымнан асатын астероидтарды мұқият зерттейді. Осындай көлемдегі ғарыш денесі Жермен соқтығысқан жағдайда, оның салдары жекелеген мемлекеттермен шектелмей, жаһандық климатқа және тіршілік жағдайына әсер етуі мүмкін.
Соған қарамастан, адамзаттың астероидтарға қарсы қорғаныс технологияларын дамытуда белгілі бір жетістіктері бар. Мәселен, 2022 жылы NASA-ның DART ғарыш аппараты Диморфос астероидымен әдейі соқтығысып, оның қозғалыс траекториясын өзгерте алды. Кейінгі бақылаулар соқтығысудың астероидтың орбиталық қозғалысына әсер еткенін растады.
Алайда бұл тәжірибе кез келген көлемдегі қауіпті астероидты Жерден бұрып жіберуге толық дайынбыз дегенді білдірмейді. Мұндай операцияның нәтижесі аспан денесінің көлеміне, құрылымына және ықтимал соқтығысудың қаншалықты ерте анықталатынына байланысты.
NASA-ның Жерге жақын ғарыш нысандарын зерттеу орталығы қазіргі уақытта алдағы жүз жыл ішінде планетамызға соқтығысу қаупі жоғары екені белгілі ірі астероид жоқ екенін хабарлайды.
Сондықтан Лев Зелёныйдың мәлімдемесі Жерге дәл қазір ірі астероид жақындап келе жатқанын білдірмейді. Ғалым ғарыштан төнуі мүмкін қауіптерді алдын ала анықтап, оларға қарсы тиімді қорғаныс жүйесін жетілдіру қажеттігіне назар аударған.
Пікірлер жоқ. Бірінші болыңыз!