Біз ұстазымызды сыртынан «Күн апа» деп атаушы едік. Апайымыз атына заты сай, керемет адам. Қашанда мейірімін төгіп, күліп тұрады. Біздің балалықпен жасаған тентектігімізге Күн апа әрдайым кешіріммен қарайтын. Жасыратын несі бар, кейде мұғалімдердің талқысына түсіп қалатын кездеріміз де болады. О, ондайда Күн апа барын салып, бізді ақтап бағады. Құдды, балапанын қатерден қорғаштаған қарлығаштай шыр-пыры шығады.
Талқылаудағы Күн апаның сөзі «Шәкірттері шетінен керемет балалар. Ана оқушының мынадай қасиеті, мына оқушының ерекше өнері бар. Бәрі жақсы. Тек, анда-санда байқамай сәл көзге түсіп қалады…» деп келеді. Ал педкеңестен соң… өзі талқыға салып есіңді тандырады. Қара терге малшынып, екінші қайталамауға уәде бересің. Қайдағы?! Көп ұзамай Күн апаның тағы да сені қорғаштап, сөйлеп тұрғанын байқамай қаласың…
Күн апа, яғни Күнила Әбубәкірова апай біздің класты бастауыштан қабылдап алды. Класс жетекшіміз әрі қазақ тілі мен әдебиеті пәнінен дәріс берді. Ұстазымыздың сабақ беру деңгейі өте жоғары еді. Жаңа тақырыпты шебер әрі ұғынықты тілмен түсіндіргенде миыңа сіңіріп жіберетін. Өз басым Күн апаның сөйлеу мәнеріне қатты қызығатынмын. Шынымды айтсам, жазу жолын таңдауыма да ұстазымның ықпалы аз тимеді.
Бірнеше жыл бұрын мектеп бітіргенімізге 40 жыл толған мерейлі күнді атап өттік. Ойдан-қырдан, еліміздің әр қиырынан келген кластастар сағына қауыштық. Күн апа бастаған ұстаздарымыз кешіміздің құрметті қонағы болды. Алдымен апайлар, кейін біз ақ тілегімізді білдірдік. Кезек маған да жетті. Микрофонды қолыма алып сөзімді бастадым. Кенет… Көзім қашанғысындай жылы жымиып, шәкірттеріне мейірлене қарап отырған ұстазымыз Күнила Әбубәкірқызына түсті. Маңдайымнан терім бұрқ етті. Жазу жазып, талай жерде, небір алқалы топтың алдында сөйлеп жүрсем де мұндай абыржымаған едім. Сасқалақтап, не айтқаным есімде жоқ. Іштей ұстаз айбатын еріксіз мойындадым.
Біз жоғары класқа көшкенде Күнила апай мектеп директорының тәрбие ісі жөніндегі орынбасары қызметіне жоғарылады. Бәріміз масаттандық. Жанымызға соншалықты жақын Күн апа енді мектептегі түрлі шараларда алдыңғы қатарда жүрді. Алайда ұстазымыз өзінің туабітті қарапайымдылығынан айныған емес.
Күнила Әбубәкірқызы өзінің ұзақ жылғы ұстаздық қызметінде абырой биігінен көрініп, көптеген марапаттарға ие болды. Қазақ ССР оқу министрлігінен жасөспірімдерге білім және коммунистік тәрбие берудегі табыстары үшін «Құрмет грамотасымен» наградталды. Ұстаздардың ұстазы атанды. Өзі ұзақ жылдар бойы қызмет атқарған қасиетті білім ордасы №94 мектептен зейнет демалысына шықты.
Апай ауыл-аймаққа аса қадірлі, текті әулет Аманбай ахунның баласы ағайынды Қайрулла, Нуфтулла мақсымның шаңырағына келін болып түсті. Өмірлік жары Зинедин аға – туып-өскен ауылының өркендеуіне өлшеусіз үлес қосқан, қазіргі таңда елдің бетке ұстар ақсақалының бірі. Өзі де атақты әулие әрі батыр Жанқожа бабаның ұрпағы Күнила апай имандылық ұғымын, адамгершілік қағидатын берік тұтынады.
Ұстазымыз құтты шаңырақтың иесі Зинедин аға екеуі екі ұл, бір қыз тәрбиелеп өсірді. Аллаға шүкір, перзенттері ат жалын тартып мінді. Қорқыт ата атындағы Қызылорда мемлекеттік университетінің түлегі қыздары Гүлзаһира – анасының жолын қуған ұстаз, қазақ тілі мен әдебиеті пәнінің мұғалімі. Гүлзаһираның жолдасы Қадірбек – көпшілікке сыйлы азамат. Ұлы Дәурен прораб болып қызмет атқарса, Еркеғали – мамандығы бойынша экономист. Зәкең мен Күнила апайдың Ахмет, Жансая, Жания есімді немерелері мен Нұрсәуле, Бабабек, Нұрбану, Нұрсая атты жиендері өсіп келеді.
Мақаламызды №94 мектеп директоры Алик Тлеумбетовтың:
– Бар өмірін бала тәрбиесіне, мұғалімдік қызметке арнаған ардагер ұстаз Әбубәкірова Күнила апай мақтауға лайықты жан. Білім беру саласында 40 жылға жуық еңбек еткен апайымыз зейнеткер болғанымен мектеппен әлі күнге дейін тығыз байланысып тұрады. Өзінің бай тәжірибесімен жас мұғалімдерге бөлісіп, ақыл-кеңесін айтады. Түрлі іс-шараларға қатысып, оқушыларға білім мен тәрбие егіз ұғым екенін жеткізеді. Мектебіміздегі ардагер ұстаздарымызға арналған арнайы бұрышта әрбір ардагеріміздің өмір тарихы және қызмет жолдары кеңінен баяндалған, – деген пікірімен түйіндесек.
Жұмабек ТАБЫНБАЕВ,
Қазалы ауданы
Пікірлер жоқ. Бірінші болыңыз!