Таяуда Елорда төрінен ақпарат тарататын спорт журналистері Аслан Қаженов пен Азамат Әбілқайыр Сыр өңіріне арнайы іссапармен келген болатын. Жұмыс сапарының басты мақсаты – жаңадан сайланған басқарма басшысы Бақтияр Артаевтың бір айда атқарған жұмыстары мен жоспарлары жайлы сұхбат жүргізе отырып, сырбойылық спорт кешендері мен ғимараттарының жұмысымен танысу. Бәрімізге белгілі, Аслан Қаженов тек журналистік репортаж жүргізіп ғана қоймай, YouTube желісіндегі белсенділігімен де елге етене таныс. Ара-арасында спорт тақырыбы төңірегінде подкасттарға эксперт-талдаушы ретінде де барып тұрады, атақты спортшылармен жүздесіп, сұхбаттасатынын да бүгінгі жастар жақсы біледі. Осы орайда қос журналист қызылордалық жасөспірім-жастармен де кездесіп, емін-еркін әңгіме-дүкен құрды.
Ең алдымен журналистер Тасбөгеттегі №5 облыстық олимпиадалық резервтің мамандандырылған балалар-жасөспірімдер спорт мектебіне барып, жұмыс барысына куә болды. Екі жылға жуық уақыт бұрын ашылған спорт орталығында екі спорт залы, жаттығу залы, емдеу бөлмесі, әкімшілік, сондай-ақ, киім ауыстыру бөлмесі қамдастырылған. Бүгінде спорт мектебінде 440 спортшы шұғылданып, 15 жаттықтырушы қызмет атқарады.
Қонақтардың келесі аялдамасы – «Мұз айдыны» кешені. Тек қана өзінің мұз алаңымен ғана емес, басқа да олимпиадалық әрі олимпиадалық емес спорт түрлерін жаттықтырып, қаншама халықаралық дәрежедегі спорт шеберінің алғашқы адымына себепкер болған спорт кешені Тәуелсіздікке қол жеткізгеннен бергі Сыр спортының тарихынан ойып тұрып орын алатыны айдан анық. Меймандар ойын залы, грек-рим, күресі, көркем гимнастика, мұз алаңы, жаттықтырушы-оқытушылар бөлмесі, сонымен қатар, спорттық билерге арналған хореографиялық сыныптардың жұмысымен танысып, жақсы пікірлермен бөлісті. Атап айту керек, нысан соңғы үлгідегі заманауи технологиялармен толық жабдықталған. Бұған дейін арт-спорттағы мәселелерге байланысты Face ID және QR кодтарды жаппай енгізу жайлы ортақ қаулы қабылданған еді. Ал «Мұз айдынында» бұл екі құрылғыдан бөлек, келушілердің игілігі үшін демалыс орны да үздіксіз жұмыс істеуде. Спорт тілшілері пайдаланылған бюджетке сәйкес орталықтың жақсы қамтамасыз етілгенін алға тартып, нысан жұмысын жақсы бағамдады.
Артынша спорт журналистері жаңадан ашылған теннис орталығымен танысты. Жай таныспай, өзара теннис ойнап, келушілерді тәнті етті. «Нұрсәт» теннис орталығында өтіп жатқан «Арбадағы теннис» жарысына дөп түсіп, марапаттау рәсіміне де қатысып, телеарнаға ақпараттандырып кетті. 18 адам қатысқан жарыста ерлер арасында Бауыржан Құлынов үздік деп танылса, әйелдер арасында Сая Абашова мықтырақ болды. Ал жұптық сайыс бойынша Бауыржан Құлынов мен Сағатбек Қуанышбаев ешкімге дес бермеген екен.
Олимпиада жеңімпазы сырбойылық жастармен жүздесті
Спорт кешендерінің жұмысын қорытындылай келе, Бақтияр Артаев пен елге белгілі журналистер сол жағалаудағы Жастар ресурстық орталығында Сыр жастарымен кездесу өткізді. Жүздесу жиыны орталық директоры Әліби Басаровтың құрметті қонақтарға мекеменің негізгі алға қойған мақсаты жайлы айтып, әр бөліммен жеке таныстыруымен басталды. Кездесу барысында Бақтияр Артаев бокстағы жетістіктері жайлы қойылған сұрақтарға жауап беріп, спортшы болудың қыр-сыры мен мән-мағынасын ашып берді. Сонымен қатар, журналистер де жастардың көкейтесті сұрақтарына жауап беріп, емен-жарқын, еркін форматта кері байланыс орната алды.
Кездесу барысында «24 KZ» телеарнасының танымал журналистері Аслан Каженов пен Азамат Әбілхайыр «Қазақ чемпиондары» атты комикс кітабын көпшілікке таныстырды. Бұл бірегей туынды еліміздің мақтанышы болған спортшылардың жеңісті жолын ерекше жанрда бейнелеген. Комикс кітабында бокстан бірнеше дүркін әлем чемпионы Геннадий Головкин, Париж Олимпиадасының жүлдегерлері Елдос Сметов, Демеу Жадыраев, Нұрбек Оралбай және Назым Қызайбайдың спорттағы жетістіктері қызықты әрі көркем түрде баяндалған. Кітап мазмұны арқылы қазақ спортшыларының қажырлы еңбегі мен жеңіске жету жолы жан-жақты сипатталады.
Жоба авторларының айтуынша, бұл комикс – еліміздегі кенжелеп қалған комикс жанрын дамытуға бағытталған ерекше қадам. Сонымен қатар, елдің даңқын әлемге паш еткен спортшылардың өмір жолын жастарға үлгі етуді көздейді.
– Бұл кітапты шығарудағы басты мақсат – жас ұрпаққа ел мақтаныштарының жетістіктерін насихаттау. Комикс жанры – қазіргі таңда жастардың қызығушылығын оятудың таптырмас құралы. Біз Геннадий Головкин, Елдос Сметов сынды тұлғалар арқылы өскелең ұрпақты шабыттандырып, олардың спортқа деген ынтасын арттыруды қаладық, – дейді кітап авторлары.
Іс-шара соңында сырбойылық жастар қонақтармен естелік суретке түсіп, ерекше көңіл күйде тарқасты. Бұл таныстырылым, сөзсіз, жергілікті жастар үшін спорт пен шығармашылық әлеміндегі жаңа серпін беретін маңызды кездесулердің бірі болды деуге толық негіз бар.
Пікірлер жоқ. Бірінші болыңыз!