ММА индустриясы алғашында еліміз үшін оңынан туды. Оны мойындамасқа болмайды. Шетел атынан жұдырықтасқан қандастарымызды алмағанда, Шавкат Рахмонов бастаған жорық жақсы жүріп жатты. Артынша Шавкаттың ізін Асу Алмабаев, Азат Мақсұм, Бекзат Алмахан, Дияр Нұрғожай сынды спортшыларымыз басып, қазақ жұрты біраз қуанып қалған еді. Осыдан бес-алты жыл бұрын қазақтардың UFC төрінде атой салғанын тек көзімізге елестетіп келдік. Асу да, Азат та бастапқыда қарсыластарын айқын басымдықпен жеңіп, үкілеген үмітімізді ақтағандай болған. Асу төрт жекпе-жек қатарынан жеңіске жетті, ал Азат болса екінші жекпе-жегінде Чарльз Джонсонға есе жіберіп қойды. Ал соңғы қазақ файтерлерінің үш жекпе-жегіне келетін болсақ, біздің спортшыларымыз барлық жекпе-жекте сенсациялық түрде жеңіліс тапты. Келеңсіз серияның басы Николай Веретенниковтың жеңілісінен басталған еді…
Николай Веретенниковтың аталған промоушнмен келісімшартының өзі қазақ ММА фанбазасы үшін күтпеген дүние болды. Расын айту керек, бұл жауынгерді көбі тани бермейді. Өзінің екі азаматтығы бар. Бірі – қазақстандық, екіншісі – американдық. Алайда, екі ел өкілі ресми Қазақстанның атынан шығады. Себебі, карьерасының көп бөлігін АҚШ-та өткізгенімен, Қазақстанда туып-өскен, мансабын бастаған. Жасы да отызды алқымдаған спортшы UFC-де екі жекпе-жек өткізіп, екеуінде жеңіліп қалып отыр. Әдетте бір жеңілістің өзін көтере алмайтын қазақстандықтар үшін екі рет қатарынан жеңілу лигадағы перспективасына қойылған нүктемен пара-пар.
Негізгі жекпе-жекте Генри Сехудо мен Сон Ядонг төбелескен кардта Веретенников американдық дебютант Остин Вандерфордпен жүздескен болатын. Жекпе-жектің екінші раундында еш қарсыластық көрсетпестен техникалық нокаутқа ұшырады. Атап өтейік, бұл – Николайдың карьерасындағы алтыншы жеңілісі. Әлі жауынгеріміздің келісімшарт бойынша екі жекпе-жегі бар. Егер қалған екі кездесуде де промоутерлерге тиісті нәтиже көрсете алмаса, UFC-ден біржола қуылатыны айқын.
Екінші жеңіліс соншама үміт артылған, потенциалы аса жеңіл салмақтың чемпионы болуға жеткілікті саналған Асу Алмабаевқа тиесілі. Промоушнның мэйн-кардында бірінші болып жекпе-жек өткізген отандасымыз португалдық-анголалық Манель Капемен алысқан-тұғын. Асу жекпе-жек басын жақсы бастағандай болды. Дегенмен, араға минут салып, сәл сасқалақтағаны байқалды. Асу мұндай дәрежедегі жауынгермен бірінші мәрте шығып тұр. Капенің бір кездері Жалғас Жұмағыловты қалайша нокаутқа түсіргенін сіз де, біз де білеміз. Бірақ, Асу жайдан-жай жеңілмеді. Жекпе-жек барысында Капе екі рет Асудың көзіне саусағын сұғып алып, көзі қанталап, жасаурап, отандасымыздың әбден ығыры шықты. Ақыр соңында үшінші раунд барысында сериялық соққыларға шыдамаған Асуды байқаған рефери жекпе-жекті тоқтатуға бекінді. Октагонда қашудан басқа амалы қалмаған Асу ертесіне көп пабликте «мем» болып та кетті. Өкініштісі сол, аздаған уақытта ерекше стилімен, тіпті шетелдік ММА фанаттарының сүйіспеншілігіне бөленген Асу әп-сәтте көптеген наразылыққа тап болды. Бірен-саран жарнамаға түсіп, той-жиындарда бой көрсеткен спортшыға «одан да жаттығу жасамады ма?» деген секілді түрлі пікір айтылды.
Сәтсіз серия таяуда ғана, наурыздың он алтысы күні өткен Fight Night эвентінде жалғасты. Көпшілік бұған дейін жеңіл салмақта отандастарымыз тым көп екенін айтып, жартылай, ауыр салмақ дәрежесінде де қазақстандықтардың өнер көрсеткенін қалайтындарын алға тартқан. Армандары орындалып, Дана Уайттың үміткерлер сериясында Дияр Нұрғожай бауырымыз әдемі хай кикпен польшалық қарсыласын сұлатып түсіріп, Дана Уайт еш ойланбастан келісімшарт ұсынған-тұғын. Келісімшарт бойынша Дияр алғашқы жекпе-жекті бразилиялық Рибейроға қарсы өткізді. Дияр жекпе-жек басталмай тұрып-ақ қазақстандықтардың уайымдауына себеп болды. Ивент алдындағы салмақ өлшеу рәсімінде салмағы тиісті келіден 2,5-ға көп болып, жекпе-жектің өтпеуіне сәл қалды. Тек Дияр өзі алған гонорардың отыз пайызын беру арқылы жекпе-жекке шыға алатын. Тіпті мұндай жағдайларда файтердің промоушннан қуылғанын да естігенбіз. Дияр шыны керек, Рибейроға кез келген аспект бойынша есе жіберіп қойды. Соққылар жағынан болсын, партерге кіруге қанша тырысқанымен, джиу-джитсу шебері Рибейро еш мүмкіндік берген жоқ. Бірінші раунд солай бразилиялық файтердің еншісіне кетті. Екінші раундтың басында Дияр сәтті тэйкдаун жасады. Бірақ қарсыласын біраз ұстап тұра алған жоқ. Тағы бір тэйкдаун нәтижесінде Рибейро отандасымыздың қолын кимура әдісіне алып, жекпе-жекті мерзімінен бұрын аяқтады.
Иә, соңғы жекпе-жектер арқылы осы күнге дейін отандастарымызды сәл асыра бағалағанымызды байқадық. Үшеуінің жеңілісінен әлде де дайындықты күшейту керек екендігін, елде ұзақ қалмай, жаттығуды мейлінше Құрама Штаттарда өткізу керектігін аңғардық. Отандық залдар әзірге UFC темпіне ілеспей тұр. Басты мәселе – шыдамдылықта. Жауынгерлеріміз раунд бастала салысымен доминация жасағысы келеді. Партердегі күрес пен тік тұрып төбелесуге қатар назар аударып, универсалды түрде мықты болғандарымен, функционалды түрде дайын болмай тұр. Екінші мәселе – оппозиция. Отандық спортшылар елдегі промоушндарда өнер көрсетіп болып, бірден әлемдегі ең мықты лига UFC-ді аңсайды. Ең болмағанда Араб, Бахрейн немесе еуропалық мықты промоушндардан тәжірибе жинау керек. Үлгі санап, қазақ ММА-сының символы ретінде дәріптеп жүрген Шавкат Рахмонов туралы соңғы жаңалықтар да көңіл көншітпейді. Белал Мухаммадпен осы мамыр айында чемпиондық жекпе-жек өткізуі тиіс жауынгер кенеттен жарақат алып қалды. Енді оның орнын австралиялық Джек Делла Маддалена баспақ. Ал соңғы жекпе-жегінде таңғалдырарлық перфоманс көрсете білген Шон Брэди рейтингтің бірінші сатысына шығып, отандасымызды төменге ығыстырды. Не де болса, келесі үміт – Бекзат Алмаханда. Әзірге бір жеңіліспен келе жатқан отандасымыз промоушндағы екінші төбелесін Брэд Котонаға қарсы Канаданың Монреаль қаласында, 11 мамыр күні өткізгелі отыр. Бекзат, сарапшылардың пікірі бойынша, фаворит. Жеңіске жетіп, жеңіліссіз серияны бұзып, қазақ жауынгерлеріне тағы бір үміт сыйлайды деп сенеміз. Ал жеңіліске ұшыраған жігіттер еңселерін түсірмей, дайындықты әлде де күшейтеді деген үміттеміз.
А.АБАЙҰЛЫ
Сурет ашық дереккөзден алынды.
Пікірлер жоқ. Бірінші болыңыз!