Фото: olympic.kz
Шілденің шіліңгір ыстығында, Астана төрі қызған рингтегі жекпе-жектермен бірге алаулап тұрды. Көк ту желбіреген елордада бокстың дүбірлі думаны — World Boxing ұйымы ұйымдастырған Әлем кубогының үшінші кезеңі өтті. Бұл жай ғана спорттық дода емес, қазақ жұдырығының жігерін әлемге тағы бір мәрте паш еткен тарихи сәт болды.
30 маусым мен 6 шілде аралығында өткен бұл турнир елімізге ерекше мәртебе сыйлады. Қазақстанда алғаш рет өткен осындай деңгейдегі жарысқа 31 елден 300-ден астам спортшы жиналды. Әлемдік деңгейдегі мықтылар елордада бас қосып, 10 салмақ дәрежесі бойынша кім мықтыны анықтады. Мұндай ауқымды жарыс Қазақстан спортының халықаралық аренадағы беделінің өсіп келе жатқанын тағы бір мәрте дәлелдеді.
Астанадағы бұл турнир қатысушылар саны жағынан бұрынғы Бразилия мен Польшада өткен кезеңдерді басып озды. Ал атмосферасы, ұйымдастырылу деңгейі мен жанкүйерлердің жанкешті қолдауы жағынан ешқандай жарыспен салыстыруға келмейтін, рух пен патриотизмге толы ерекше додаға айналды.
Жалпы нәтиже: Қазақстан — көшбасшы
Турнирдің қорытындысы — қазақ боксының болашағының жарқын екенін көрсетті. Қазақстан құрамасы командалық есепте топ жарып, 8 алтын, 4 күміс, 4 қола медальмен бірінші орынды иеленді. Бұл — бір ғана жарыстағы жеңіс емес, жылдар бойы салынған еңбектің, жүйелі жаттығу мен жанкештіліктің жемісі.
Осы нәтижемен Қазақстан құрамасы Әлем кубогының жалпы есептік кестесінде бірден бесінші орыннан екінші орынға көтерілді. Қазір ел қоржынында жалпы 11 алтын, 7 күміс, 7 қола бар. Бірінші орында әзірге Өзбекстан, бірақ Астанадағы нәтиже біздің құраманың алда әлі талай белесті бағындыратынын айқын көрсетті.
Президент қатысқан финал — боксшыларға шабыт
Турнирдің шарықтау шегі — финалдық күнде Мемлекет басшысы Қасым-Жомарт Тоқаевтың арнайы келіп, шешуші кездесулерді трибунадан тікелей тамашалауы болды. Президенттің спортшыларды жарыс соңында жеңісімен құттықтап, алғысын білдіруі бұл турнирдің ел үшін, спортшылар үшін қаншалықты маңызды болғанын көрсетті.
— Жеңістеріңіз құтты болсын! Бокспен тек мықты, күш-жігері мол адамдар шұғылданады. Бұл — ерекше спорт. Баршаңызға сәттілік тілеймін. Қазақстанда бокстың келешегі зор екеніне ешқандай күмәнім жоқ, — деді Қасым-Жомарт Тоқаев.
Осы қолдау рингке шыққан әр спортшының жеңіске деген жігерін қайрады деуге толық негіз бар. Ел алдында, Мемлекет басшысының алдында жұдырықтасу — бұл тек спорт емес, жауапкершілік пен намысқа сын.
Рингтегі ерлік: әрбір медаль — бір-бір тарих
Байрақты бәсекеде жеңіске жеткен боксшылар тек қарсыласын емес, өз ішіндегі әлсіздік пен шаршауды да жеңіп шықты. Әрбір алтын — маңдай тердің, қан мен қажырдың өтеуі.
Назым Қызайбай – рингтегі темірдей төзімнің иесі
48 келіде жұдырықтасқан үш дүркін әлем чемпионы Назым Қызайбай бұл жолы да жеңіс жолынан жаңылған жоқ. Финалда үндістандық Минакши Минакшимен шиеленісті айқас өткізді. Соңғы раундқа дейін есеп тең дәрежеде өрбіді. Алайда шешуші сәтте Назымның тәжірибесі мен темірдей төзімі өз жемісін беріп, 3:2 есебімен басым түсті. Назым бұл турнирде нағыз чемпионға тән ойынды көрсетті: қарсыласын зерттеп, әр раунд сайын тактикасын өзгертіп отырды.
Санжар Тәшкенбайға жаңа салмақ жаңа дем сыйлады
50 келі салмаққа жаңадан ауысқан Санжар Тәшкенбай өзіне сенімді екендігін бірден байқатты. АҚШ-та өткен жаттығу жиындарының пайдасын көрген Санжар жарыс бойы қарсыластарын есеңгіретіп, еш күмәнсіз чемпион атанды. Финалда шапшаң қимылдап, төменнен жоғары бағытталған соққылармен қарсыласын қыспаққа алды. Жаңа салмаққа тез бейімделуі — оның шеберлігінің дәлелі.
Махмұд Сабырхан – жұдырықтаспай жеңген чемпион
55 келіде сынға түскен Махмұд Сабырхан рингке шықпай-ақ алтын медальға ие болды. Қарсыласы финалдан бас тартқанымен, Махмұд жарыс бойы тамаша өнер көрсетіп, әр раундта өз артықшылығын дәлелдеді. Оның техникасы — жеңіл әрі нық, қарсыласты шаршататын темпімен ерекшеленді.
Сабыржан Аққалықовтың ескі есепті түгендеген қарымтасы
75 келідегі Сабыржан Аққалықов бұл жарыста өзін жаңа қырынан көрсетті. Финалда бұған дейін жеңіліп қалған қарсыласымен кездесіп, есепті 2:0 етіп түгендеді. Қарсыласын бірінші раундтан бастап қыспаққа алып, орта дистанцияда жұмыс істеді. Әр соққысы нысанаға дөп тиіп, көрермендердің қошеметіне бөленді.
Бекзат Нұрдәулетов: нокаутқа жақын шеберлік
85 келіде ел намысын қорғаған әлем чемпионы Бекзат Нұрдәулетовтің жойқын соққылары шаршы алаңды дүр сілкіндірді. Финалда үндістандық Жугнуды бірінші раундта-ақ нокдаунға түсіріп, қалған бөлігінде мүлде басым болды. Соңғы қоңырауға дейін қарсыласына тыныштық бермей, 5:0 есебімен жеңіске жетті. Бұл — шеберліктің шыңы.
Айбек Оралбай — сабыр мен сойқанның симфониясы
92 келіде күш сынаған Айбек Оралбай неміс алыбы Никита Путиловпен финалда жұдырықтасып, салмақты әрі сауатты бокс көрсетті. Әр соққысы есеппен, әр қимылы жоспармен жасалды. Қарсыласының ұзын қолдарын бейтараптандырып, ішке қарай шабуылдады. Үш раунд бойы толық басымдықпен жеңіске жетті.
Виктория Графееваның соңғы минуттағы жеңісі
60 келідегі Виктория Графеева алғашқы раундта бразилиялық қарсыласынан ұтылып жатқандай көрінді. Бірақ келесі раундтарда ол тактиканы өзгертіп, қысыммен жұмыс істеді. Қарсыласының соққыларынан жалтарып, өзі тура соққылармен жауап берді. Жеңісті тартысты айқастан жұлып алды.
Наталья Богданова финалда қарсыласын тұқыртты
70 келідегі Наталья Богданова финалда аустралиялық Лекейши Перголитиге еш мүмкіндік қалдырмады. Жекпе-жек басынан-ақ Натальяның басымдығымен өтті. Оның қорғаудан кейін қарсы шабуылға шығу тактикасы өте тиімді болды.
Күміс пен қоланың да салмағы бар
Күміс жүлдені Алуа Балқыбекова, Надежда Рябец, Елдана Тәліпова және Нұрбек Оралбай жеңіп алды. Әсіресе, Нұрбек пен Алуа финалда барын салды. Ал қоланы Айдана Забынбекова, Аида Әбікеева, Сағындық Тоғамбай еншіледі. Бұл нәтижелер де маңызды, себебі олар ұлттық құраманың кең ауқымды әлеуетін көрсетеді.
Бапкер бағасы: «Бес!»
Ерлер құрамасының бас бапкері Қайрат Сәтжанов турнир қорытындысына оң баға берді.
— Жалпы нәтиже жақсы. “Бес” деген баға беруге болады. Егер тағы екі жігіт жеңіске жеткенде — “бес плюс” болушы еді. Алтын алғандар міндетті түрде Ливерпульдегі әлем чемпионатына барады, — деді ол.
Бұл жарыс бапкерлер мен спортшылар еңбегінің жемісі. Әрбір жеңіс — жоспарлы дайындықтың нәтижесі.
Бокс — халықтың сүйікті спорты
Астана төріндегі бұл дода — тек жекпе-жек алаңы емес, ұлттық рухтың көтерілген, жанкүйерлердің қуаныш пен мақтанышқа бөленген алаңы болды. Спортшылардың әр жеңісі — елге сенім ұялатқан қуаныш сәттері. Бұл жарыс Қазақстанда бокстың тек спорт емес, ұлттың айбыны екенін тағы бір мәрте дәлелдеді.
Астанада өткен Әлем кубогының үшінші кезеңі — қазақ боксы үшін жаңа белес, жас спортшылар үшін үлкен мүмкіндік, ал жанкүйерлер үшін ұмытылмас тарихи оқиға болды. Рингте жасындай жарқылдаған спортшыларымыз тек медаль алып қана қойған жоқ, олар әлемге қазақ жұдырығының қуатын, намыстың салмағын, мінездің биіктігін көрсетті.
Келесі межеміз — Ливерпульде өтетін әлем чемпионаты. Астанадағы жеңіс соған апарар жолдағы сенімді қадам болды. Ал бұл жолда қазақ жұдырығы тайсалмайтынына сенім мол.
Мұхаммедшах КАЮП,
журналист
Пікірлер жоқ. Бірінші болыңыз!