Президент Қорғаныс министрінің есебін тыңдады

Мемлекет басшысы, Қазақстан Қарулы Күштерінің Жоғарғы Бас қолбасшысы Қасым-Жомарт Тоқаев Қорғаныс министрі Дәурен Қосановты қабылдап, ведомствоның 2025 жылы атқарған жұмысы туралы есепті тыңдады. Министр армияның жауынгерлік әзірлігі, Қарулы күштерді дамыту бағыттары, цифрлық технологияларды енгізу және қорғаныс инфрақұрылымын жетілдіру жөнінде баяндады. Сондай-ақ әскери тәртіпті нығайтуға қатысты Президент тапсырмасының орындалу барысы сөз болды. Кездесу қорытындысында Мемлекет басшысы армияның дайындық деңгейін арттыру және әскери-құқықтық тәртіпті күшейту жөнінде нақты тапсырмалар берді.