Облыс әкімі Нұрлыбек Нәлібаев Арал ауданы Тоқабай елді мекеніндегі 100 орындық мектептің құрылысымен танысты. 2020 жылы «NTDK Group» ЖШС-ның техникалық қорытындысы бойынша мектеп ғимараты апаттық жағдайда деп танылып, «Баспана Қызылорда» ЖШС-ның сараптамасы негізінде ғимаратты бұзып, қайта салу қажеттігі анықталған. Қазіргі таңда негізгі оқу корпусы пайдалануға берілген. Спорт, акт залдарына, сынып кабинеттеріне сейсмикалық белдеу құйылып, күрделі жөндеу жүргізілуде.
Аймақ басшысы құрылысқа қойылатын басты талап сапа екенін тағы бір ескертіп, жұмысты уақытылы аяқтаудың маңызын атап өтті.
Айта кетейік, өткен жылы аймағымызда 6 жаңа мектеп, 5 мектептің жанынан қосымша ғимарат, «ҚазГермұнай» компаниясының демеушілігімен Қызылорда қаласында «Оқушылар сарайы», Жаңақорған ауданында «Оқушылар үйі» мен «Өнер мектебі» ел игілігіне табысталды. Балалар мен жасөспірімдердің шығармашылығын шыңдау мақсатында облыс орталығынан «Шығармашылық академиясы», дарынды балаларға арналған физика-математика мектеп-интернаты салынуда.
2023 жылы облыс орталығындағы 4 мектептің жанынан 1 850 орынға арналған қосымша ғимарат бой көтерді. Бұл бюджетке салмақ түсірмей, қаржыны үнемдеуге, сол арқылы үш ауысымды оқытуға көшуі мүмкін мектептер мәселесін шешуге жол ашты. Былтыр 8 мектеп ғимаратына күрделі жөндеу жүргізілді. Мемлекет басшысының 1 300 мектепті күрделі жөндеу тапсырмасына сәйкес алдағы үш жылға 51 білім ошағы жоспарланған.
Пікірлер жоқ. Бірінші болыңыз!