Бүгін Мәжілісте «Психологиялық қызмет туралы» заң жобасы қаралып, оның негізгі бағыттары депутат Асхат Аймағамбетов тарапынан түсіндірілді. Жаңа құжаттың басты мақсаты – психологиялық көмек көрсету саласында бірыңғай талаптар мен кәсіби стандарттарды қалыптастыру.
Депутаттың айтуынша, заң аясында өзін психолог ретінде таныстырып, бірақ тиісті білімі мен лицензиясы жоқ тұлғалардың қызметіне шектеу қойылады. Мұндай талап бұзылған жағдайда заңдық жауапкершілік қарастырылмақ. Сонымен қатар, әлеуметтік желілерде «психолог» ретінде өзін жарнамалайтындардың көбеюі бұл бастаманың өзектілігін арттырып отыр.
Асхат Аймағамбетов психология саласындағы ұғымдарды нақты ажырату қажеттігін де атап өтті. Оның түсіндіруінше, психиатр клиникалық деңгейде, дәрі-дәрмекпен ем жүргізетін маман болса, психолог адамның эмоциялық және психологиялық жағдайымен жұмыс істейді. Осы екі мамандықтың айырмашылығын заң жүзінде нақтылау маңызды.
Заң жобасында кәсіби құпия мәселесіне де ерекше мән берілген. Бұған дейін мұндай норманың нақты бекітілмеуі азаматтардың жеке деректерінің қорғалуына қауіп төндірген. Жаңа заң қабылданса, психологтар клиенттің сеніп айтқан ақпаратын жария етпеуге міндеттеледі, ал бұл талапты бұзу қатаң жауапкершілікке әкеледі.
Сондай-ақ, құжат коучинг пен психологиялық көмектің аражігін нақты ажыратады. Коучтар психологиялық кеңес беруші ретінде қарастырылмайды және олардың қызметі арнайы стандарттармен реттеледі. Осылайша, заң жобасы психологиялық қызмет саласындағы ретсіздікті азайтып, азаматтардың қауіпсіздігін күшейтуді көздейді.
Фото: kz.kursiv.media
Пікірлер жоқ. Бірінші болыңыз!