Жаңақорған ауданында 2025 жылы әлеуметтік-экономикалық көрсеткіштерде тұрақты өсім байқалып, бірқатар маңызды әлеуметтік нысандар пайдалануға берілді. Өнеркәсіп өнімінің көлемі 104,5 пайызға жетіп, өңдеу өнеркәсібі 102,5 пайызға орындалса, ауыл шаруашылығы жалпы өнімі 103,1 пайызға жетті.
Аудан әкімі Мәжит Самитовтың айтуынша, қаржы мүмкіндігінің ұлғаюы әлеуметтік инфрақұрылымды күшейтуге және елді мекендердегі тіршілік сапасын арттыруға жол ашқан. Соның ішінде білім беру, денсаулық сақтау, мәдениет және көлік инфрақұрылымына қатысты жобалар ерекше назарда болған.
- Аудан бюджеті 2025 жылдың басында 14,2 млрд теңге болып бекітіліп, қосымша кіріс көздерін арттыру және жоғары тұрған бюджеттерден алынған нысаналы даму трансферттері есебінен ұлғайтылып, жыл соңында 18,7 млрд теңгеге жетті. Мемлекет басшысының бастамасымен жүзеге асып жатқан жоба аясында Жаңақорған кентінде 600 орындық, Жаңарық ауылында 300 орындық «Келешек» мектептері, «Руханият» орталығы, Екпінді ауылдық клубы салынып, пайдалануға берілді. Әлеуметтік жағынан әлсіз топтарына жататын 124 отбасына баспана кілті тапсырылса, Төменарық ауылында аурухана, Әбдіғаппар, Бесарық ауылдарында дәрігерлік амбулаториялар ел игілігіне пайдалануға берілді. Аудан орталығында осыдан 40 жыл бұрын басталып, аяқсыз қалған темір жол үстінен өтетін көпірдің құрылысы қайта жаңғыртылып, өткен жылдың шілде айында іске қосылды. Арнайы мемлекеттік қордан тиісті қаржы бөлініп, Жаңақорған аудандық көпбейінді аурухана жанынан қосымша ғимарат салынып, қазіргі таңда науқастар ем алуда. Биылғы жылы бұл ғимаратқа заманауи МРТ, ангиограф аппараттары орнатылып, аудан тұрғындарына сапалы қызмет көрсететін болады. Былтырғы жылдың осындай құрылыс қарқыны сақталып, биылғы қаңтар айының өзінде ғана әлеуметтік осал топтағы отбасыларына арналған 80 пәтерлі 40 тұрғын үй мен Келінтөбе ауылындағы дене шынықтыру — сауықтыру кешені пайдалануға берілді,- деді Мажит Самитұлы.
Пікірлер жоқ. Бірінші болыңыз!