Бұл туралы Қазақстандық қоғамдық даму институтының сарапшысы пікір білдірді.
Оның айтуынша Арал теңізінің тартылуы тек экологиялық мәселе емес, әлеуметтік мәселеге де жатады.
«Арал теңізі соңғы жылдары тек экологиялық трагедия ретінде ғана емес, адам, табиғат және жауапкершілік арасындағы жоғалған тепе-теңдіктің символы ретінде қабылданып келеді. Бірақ бүгін бұл символ енді тек жоғалтудың белгісі болып қалмай отыр. Солтүстік Аралға балық қайта оралып жатыр, климат біртіндеп жұмсарып келеді. Су көбейген сайын үміт те пайда болады. Бұл үміт әзірге сақтықпен айтылғанымен, қазірдің өзінде нақты әрі шынайы.
Дәл осы туралы Мемлекет басшысы Қасым-Жомарт Тоқаев V Ұлттық құрылтайдың отырысында айтты. Президент Кіші Аралдағы су деңгейін көтеруге нақты мүмкіндік бар екенін атап өтті. Қазақстан бес жыл бойы жүйелі жұмыс жүргізудің нәтижесінде Солтүстік Аралды сақтап қалды. Бұл тәжірибе экологиялық саясат ғылымға сүйеніп, ұзақ мерзімді жоспармен және халықаралық ынтымақтастықпен жүргізілген кезде ғана нәтиже беретінін көрсетіп отыр.
Бүгін Арал мәселесі тек экология емес. Бұл су қауіпсіздігі, өңірлердің тұрақты дамуы және әлеуметтік тұрақтылық мәселесі. Осы тұрғыда Ұлттық құрылтай символикалық мәлімдемелер айтылатын алаң емес, суға, жерге және адамдардың болашағына тікелей әсер ететін нақты шешімдер қабылданатын кеңістікке айналып отыр», – деді Марат Әлиев.
Пікірлер жоқ. Бірінші болыңыз!