Мемлекет басшысы Қасым-Жомарт Тоқаев еліміздің инфрақұрылымын дамытуға, әсіресе елді мекендерді табиғи газбен қамтамасыз ету мәселесіне ерекше назар аударып келеді. Осы бағытта жүзеге асып жатқан жүйелі жұмыстың жарқын көрінісі бүгінде Қармақшы ауданында да жалғасуда.
Осыған орай, кеше аудан әкімі Жандос Еркінбектің қатысуымен Жосалы ауылдық округін табиғи газбен қамтамасыз ету жұмыстарының басталуына арналған салтанатты іс-шара өтті. Бұл туралы аудан әкімінің баспасөз қызметі ақпарат таратты.
Жиында сөз алған Жандос Еркінбек бұл жобаның ауыл тұрғындары үшін маңыздылығын айта өтіп, азаматтарды көптен күткен қуанышымен құттықтады.
Жалпы, 2020-2024 жылдар аралығында Жосалы, Төретам кенттері мен Ақай елді мекенін және Жосалы кентіндегі«Тәуелсіздік» ықшам ауданын газбен қамтамасыз етуге 5,5 млрд теңге бөлініп, жұмыс толық аяқталып, халық игілігіне берілді. Сондай-ақ 2025 жылғы желтоқсан айында облыс әкімі Нұрлыбек Нәлібавтың арнайы қатысуымен құны 7 млрд теңгеден асатын жоба арқылы Дүр Оңғар ауылына газ жеткізіліп, «көгілдір отынмен» қамтылды.
Бүгін басталайын деп отырған Төребай би ауылын газдандыру жобасына республикалық бюджеттен 497 млн теңге бөлініп отыр. Жоба аясында 21 шақырымнан астам газ құбыры тартылып, елді мекен тұрғындары жылу беру маусымына дейін табиғи газ игілігін көретін болады. Сонымен қатар жалпы құны 379 млн теңге болатын Иіркөл ауылын «көгілдір отынмен» қамту жұмыстары басталатын болады.
Жиын барысында еңбек ардагері Сабытбек Жолмаханов сөз сөйлеп, маңызды бастамамен құттықтаса, ауыл ақсақалы Жақсылық Жалғасбаев ақ батасын беріп, басталған істің берекелі болуына тілегін білдірді.
Тағылымы мол салтанатты іс-шара әсем ән мен әсерлі концерттік бағдарламамен жалғасты.
«Бұл атқарылған жұмыстар – тұрғындардың тұрмыс сапасын жақсартуға бағытталған істердің нәтижесі. Біз алдағы уақытта да ел игілігі үшін мұндай жобаларды жүйелі түрде жалғастыра береміз. Себебі халықтың әл-ауқатын арттыру – біздің басты міндетіміз. Осы орайда жүзеге асырылып жатқан жұмыстарға қолдау көрсетіп отырған барша азаматқа алғысымды білдіремін! Ел бірлігі мен ынтымағының арқасында болашақта да үлкен жетістіктерге жетеміз деп сенемін», — деді аудан басшысы.
Пікірлер жоқ. Бірінші болыңыз!