Бүгін Жәлел Қизатов атындағы №23 мектеп-лицейінде білім ордасының 40 жылдық мерейтойына арналған «Тамыры терең мектебім» атты салтанатты шара жоғары деңгейде өтті.
Бұл мерекелік күн білім мен тәрбиенің алтын ұясы атанған мектептің терең тарихын, жетістіктерін және болашаққа деген нық сенімін паш етті.
Іс-шараға басқарма басшысы Есжанов Асқарбек Темірбекұлы, ардагер ұстаздар, Кеңес Одағының Батыры Жәлел Қизатовтың отбасы мүшелері, қала қонақтары мен мектеп түлектері арнайы қатысты. Шара барысында Асқарбек Темірбекұлы құттықтау сөз сөйлеп, мектептің дамуына сүбелі үлес қосқан бірқатар ұстаздарды Құрмет грамотасымен марапаттады.
Салтанатты жиын Кеңес Одағының Батыры Жәлел Қизатовтың ескерткішіне гүл шоғын қою рәсімімен басталып, әрі қарай «Зерттеу. Ізденіс. Шығармашылық идеялар» көрмесіне ұласты. Көрмеде оқушылар мен ұстаздардың бірлескен ғылыми, шығармашылық жобалары мен мектеп тарихына арналған тың деректер көпшіліктің назарына ұсынылды.
Мерейтой аясында «Батыр атындағы білім ордасы» атты кітаптың тұсауы кесіліп, Жәлел Қизатовқа арналған «Ерлікке тағзым» бұрышы таныстырылды. Бұл бөлім болашақ ұрпаққа батырлықты дәріптеп, отансүйгіштікке баулудың жарқын көрінісі болды. Шара соңы өнерлі оқушылар мен түлектердің қатысуымен өткен мерекелік концертке ұласып, мектеп мерейтойының ерекше рухани сәттерін толықтырды.
©️Қызылорда облысының білім басқармасының баспасөз қызметі
Пікірлер жоқ. Бірінші болыңыз!