АҚШ-тың Иранмен қақтығыс кезінде бірнеше әскери әуе техникасынан айырылғаны туралы мәліметтер халықаралық медиада жарияланып жатыр. Соңғы күндері жарияланған материалдарда Иран аумағында құлаған F-15E Strike Eagle жойғышы, зақымданған немесе жойылған арнайы операция ұшақтары және өзге де әуе техникасы сөз болады.
Reuters агенттігінің жазуынша, Иран аумағында құлаған F-15E ұшағы экипажының екінші мүшесін құтқару операциясы аса күрделі жағдайда өткен. Операция барысында ұшуға жарамсыз болып қалған екі MC-130 ұшағы құпия технология қарсы тараптың қолына түспеуі үшін жойылған. Бұл мәліметті AP пен Wall Street Journal да өз материалдарында келтіреді.
Бұған қоса, AP және басқа да басылымдар Иран тарапы F-15E-ден бөлек, A-10 шабуылдаушы ұшағының да әуе қорғанысы соққысынан зардап шеккенін хабарлағанын жазды. Алайда мұндай эпизодтардың бір бөлігі бойынша Иран мәлімдемелері тәуелсіз түрде толық расталмаған.
Reuters таратқан тағы бір ақпаратта Иран әскері құтқару операциясы кезінде бірнеше «жау әуе нысаны» жойылғанын мәлімдеген. Атап айтқанда, Тегеран екі әскери-тасымалдау ұшағы, екі Black Hawk тікұшағы, сондай-ақ дрондар жойылғанын алға тартқан. Бірақ бұл деректердің бәрі әлі тәуелсіз көздермен толық дәлелденбеген.
Соңғы жарияланымдарда АҚШ тарапы үшін ең ірі шығындардың бірі – Иран үстінде атып түсірілген F-15E жойғышы мен оны құтқару операциясы кезінде істен шыққан арнайы авиация техникалары екені айтылады. Кей материалдарда жалпы жоғалтулар саны бұдан да көп болуы мүмкін деген болжам бар, бірақ нақты расталған эпизодтар мен қарсы тарап мәлімдеген шығындарды араластырмай қарау қажет.
Фото: inbusiness.kz
Пікірлер жоқ. Бірінші болыңыз!