АҚШ пен Иран екі аптаға атысты тоқтату туралы келісімге келді. Бұл туралы АҚШ президенті Дональд Трамп TruthSocial әлеуметтік желісінде мәлімдеді.
Трамптың жазуынша, ол Пәкістан премьер-министрі Шехбаз Шарифпен және елдің құрлық әскерлерінің бастығы Асим Мунирмен сөйлескенін, осыдан кейін Иранға соққы жасауды екі аптаға дейін тоқтатуға келіскенін жазды.
«Олар бүгін кешке менен Иранға талқандаушы күштерді жіберуден бас тартуымды сұрады. Мен Иран Ислам Республикасы Ормуз бұғазын ТОЛЫҚ, ДЕРЕУ және ҚАУІПСІЗДІКТІ САҚТАЙ ОТЫРЫП АШУҒА келісім берген жағдайда, Иранды бомбалауды және шабуылдарды екі аптаға тоқтатуға келісемін», — деді Ақ үй басшысы.
Трамп АҚШ-тың барлық әскери мақсаты қазірдің өзінде «асыра орындалғанын», Америка Құрама Штаттары «Иранмен ұзақмерзімді бейбітшілік және Таяу Шығыстағы бейбітшілік туралы түпкілікті келісімге қол жеткізуде үлкен жетістіктерге жеткенін» атап өтті.
Оның айтуынша, Вашингтон Тегераннан «келіссөздер үшін қолайлы негіз болып табылатын» 10 тармақтан тұратын ұсыныс алған, ал екі апта уақыт Таяу Шығыстағы бейбітшілік туралы түпкілікті келісімге келу үшін қажет.
«Америка Құрама Штаттарының атынан, президент ретінде және Таяу Шығыс елдерінің атынан бұл ұзақ уақытқа созылған мәселенің шешілуге жақын қалғаны – мен үшін үлкен абырой», — деп түйіндеді Трамп.
Дереккөз: kaz.nur.kz
Фото: АҚШ пен Иран тулары.
Иллюстрациялық фото: MicroStockHub/Getty Images
Пікірлер жоқ. Бірінші болыңыз!