Дәл қазір – күн райының қолайсыз уақыты. Суық өңменіңізден өтіп, денеңізді сырқатқа шалдықтырмасын. Дәрігерлердің айтуынша, адам ағзасындағы D дәруменінің қоры азайса, төмендегідей аурулар күшейіп, иммунитетіңіз төмендейді екен. Сол үшін бұл аурулардан сақтау шараларын үзбей жасап тұруға кеңес береміз.
Тұмау – тұмау вирустары қоздыратын жұқпалы ауру. Тұмау жіті респираторлық вирустық инфекция тобына жатқанымен, мұны жай ғана суық тиюмен шатастырмау керек, өйткені өкпе, жүрек, ми қабынуының асқынуына әкеп соқтыруы ықтимал. Тұмауратқанда үйден шықпай, көбірек демалып, жылы сұйықтық (су, шай, компот, морс, сорпа және тағы басқа) ішу керек. Дене қызуы түспей, тыныс алу қиындап, ентіге бастағанда, кеуде тұс, іш ауырса, бас айналса, дәрігерге жүгіну қажет. Тұмаудың алдын алу үшін қолды үнемі сабындап жуып, қоғамдық орындарда маска тағып және әлеуметтік арақашықтықты сақтап, жыл сайын тұмауға қарсы екпе салдырған жөн.
Менингит – өте қатерлі ми ауруы. Менингококк инфекциясы қыста және ерте көктемде өршиді. Көбiне суықтан пайда болатын бұл ауру ми мен жұлынның жұмсақ қабықтарының қабынуынан туындайды. Инфекция ауа-тамшы арқылы, яғни жөтелген, түшкірген, сөйлескен кезде жұғады. Мұрынға түскен бактерия жұлынға жетiп, қан айналымына енiп, қоздырғыштарды күшейтедi. Иммундық жүйесінің қалыптаспауына байланысты бес жасқа дейінгі балалар онымен жиі ауырады. Менингит белгілері: бастың қатты ауыруы, шөлдеу мен құсу, дене қызуының көтерілуі, қалтырау, бозару, тәбеттің төмендеуі, бөртпе, әлсіздік, арқа және аяқ қолдың ауыруы. Белгілердің бірі байқалса, міндетті түрде дәрігерге жүгінген жөн. Аурудың тұмау, баспа, тонзиллит сияқты зиянсыз ауруларға ұқсап, жеңіл өтуі мүмкін, сондықтан өте қауіпті. Бұл дерттен қорғану үшін адамдар көп жиналатын жерлерге бармау керек, сондай-ақ, суықтамау және ауа райына қарай киіну керек. Жеке гигиена ережелерін сақтап, саламатты өмір салтын ұстану қажет.
Отит немесе құлақтың қабынуы. Құлақтың қабынуының лас су арқылы құлаққа инфекцияның түсуі, толық емделмеген инфекциялық аурулар, ұзаққа созылған салқын тию секілді бірнеше себебі болуы мүмкін. Құлақ инфекциясының жиі кездесетін түрі – ортаңғы құлақтың қабынуы. Ортаңғы құлақ қуысына суық тиіп, қабынғаннан және жасушалардың ісінуінен пайда болады. Асқынған құлақ инфекциясы аз уақыттың ішінде дамиды және ауыр түрде өтеді. Отитті дәрі-дәрмекпен, физиотерапия және хирургиялық жолмен емдейді. Құлаққа тамызатын тамшылар мен антибиотиктерді дәрігер кеңесімен пайдаланған жөн. Отиттің алдын алу үшін құлақты үнемі тазалап, ішкі және сыртқы қабатын жуып отыру керек. Суық күнде құлақты жылы ұстап, бас киім киіп жүру қажет.
Гайморит – үстіңгі жақта орналасқан мұрынның қосалқы қуысының қабынуымен сипатталатын ауру. Бұл дертпен адамдар көбінесе суық мезгілде ауырады. Әсіресе, жеңіл киініп, денсаулығына немқұрайды қарайтындар ауруға тез шалдығады. Сондықтан, гаймориттің алғашқы симптомдарын байқаған соң, бірден отоларинголог маманға көріну керек. Бұл дерттің алдын алу үшін салқын тигізбеу, тұмау ауруының кез келген белгісі байқала салысымен емдеу және саламатты өмір салтын ұстанып, иммунитетті ұдайы нығайту қажет.
Бронхит – бронхтардың шырышты қабатының қабынуы. Бронхитке көбінесе жөтел тудыратын инфекциялар себеп болады, алайда бронхит созылмалы да болуы мүмкін. Бұл әдетте өкпеге ауа өтетін түтікшенің ішіне төселген тіндер қабынған кезде болады. Бұл түтікшелер бронхтар деп аталады. Әдетте адамдардың бронхитпен ауыруына суық тиюі немесе тұмау себеп. Бронхиттің басты белгісі – бірнеше аптаға дейін созылатын ұзақ жөтел.
Көп жағдайда бронхит өздігінен кетеді, бірақ ол үшін бірнеше апта қажет. Бронхит антибиотиктпен емделмейді, себебі антибиотик бактерияларды ғана жояды, ал бронхитке көбіне вирустар себеп болады. Жазылып кету үшін, демалып, көп мөлшерде сұйық ішу керек. Одан бөлек, тамақтың тітіркенуін қойдыратын дәрі-кәмпиттер тұтынып, тұмау мен жөтелге қарсы дәрілер ішіп, салдырып тұрыңыз.
Цистит немесе қуықтың қабынуы. Қуыққа инфекция түскеннен пайда болады. Аурудың дамуына қуықтың шырышты қабығын тітіркендіруге дененің қатты тоңуы себепші болуы мүмкін. Дене ауырса жылы ванна қабылдап, жылы су көп ішіп, жиі дәретке шыққан абзал. Осылайша ағза инфекциямен оңай күреседі. Денені суықтатуға болмайды. Жалпы зәр анализін тапсырып, қажет ем тағайындау үшін нефрологқа жүгініңіз. Зәр қызыл түсті болса, арқа немесе іштің екі жағы ауырса, дене қызуы көтеріліп, лоқсу не құсу секілді белгілер болса, тезірек дәрігердің көмегіне жүгіну қажет.
Бұл сырқаттардың белгілері байқалса, дереу дәрігерге жүгінуге кеңес береміз. Қазір күн райының суытқан кезінде бұл өзіңізге де, жақындарыңызға да қауіп тудыруы мүмкін. Дегенмен, ауырып, ем іздегенше, ауырмайтын жол іздеңіз, қадірлі оқырман!
Дайындаған Е.СӘРСЕНҰЛЫ
Пікірлер жоқ. Бірінші болыңыз!