Қызылорда облысының бұрынғы әкімі Қуанышбек Ысқақовтың қамауға алынуына қатысты ақпарат пайда болды. Сот экс-шенеунікті үйқамаққа алу туралы үкім шығарған, деп хабарлайды kaz.nur.kz.
Қызылорда облыстық соты баспасөз қызметінің хабарлауынша, Сыбайлас жемқорлыққа қарсы іс-қимыл агенттігі 28 наурызда Қызылорда қаласының мамандандырылған тергеу сотына Қызылорда облысының бұрынғы әкімі Қуанышбек Ысқақовқа қатысты үйқамақ түріндегі бұлтартпау шарасын қолдану туралы өтінішхат берген. Оған аса ірі көлемде алаяқтық жасады деген айып тағылған. Сот өтінішті қанағаттандырып, Ысқақов «үйқамаққа» алынған. «Үйқамақ» бұлтартпау шарасының 2 (екі) ай мерзімі 26.03.2020 жылы сағат 22:28-ден бастап 26.05.2020 жылы сағат 22:28-ге дейін белгіленген», – деді баспасөз қызметі. Айта кетсек, қаулы әлі заңды күшіне енбеген.
Еске сала кетсек, 27 наурызда әлеуметтік желілер мен мессенджерлер арқылы Қуанышбек Ысқақовтың ұсталғаны туралы ақпарат тарады. Саясаткер Ербол Еділов өзінің Telegram арнасында кейбір дереккөздердің дерегіне сүйене отырып жемқорлықпен күресушілер бұрынғы әкімді ғана емес, оның орынбасарын, сондай-ақ оған туыс болып келетін екі кәсіпкерді де ұстағанын хабарлады. Алайда бұл ақпаратты ешбір ешбір жауапты орған не растап, не жоққа шығармаған еді.
Сондай-ақ, 28 наурызда Қызылорда облысының әкімі қызметіне Гүлшара Наушақызы Әбдіқалықованың тағайындалғаны белгілі болды.
Пікірлер жоқ. Бірінші болыңыз!